Xanana la partisipa diálogu, CNRT hato’o opiniaun rezolve impasse polítiku ba PR liu husi karta

Sekretáriu Jeral Partidu  CNRT, Francisco Kalbuadi Lay hateten, Partidu CNRT entrega ona kart aba Prezidente Repúblika (PR) kona bá, opiniaun CNRT nian rezolve impasse polítiku iha rai laran.

 “Agradese ba sua exselensia Prezidente Repúblika, ne’ebé mak konvida ami hanesan partidu, no partidu CNRT, tanba ne’e mak ami senti onra tebes, ohin bele mai  hato’o hela ami nia hanoin, ne’ebé mak ita hotu hatene, depois de orsamentu ne’e la pasa, tuir konstuisaun repúblika númeru 74 katak, tenke mai rona fali orientasaun ne’ebé mak Prezidente sei foti”, informa  Kalbuadi Lay ba Jornalista sira Kinta (23/01/2020), hafoin halo diálogu ho Xefe Estadu iha Palásiu Prezidnesial Nicolau Lobato Bairo Pité, Díli.

Nia afirma, tuir saida mak lider CNRT sira rona husi Prezidente mak, komesa ohin ba oin, Prezidente sei konvida partidu sira seluk, no mós sosiedade sivíl no komponente hotu iha rai ida ne’e, atu buka solusaun ida ne’ebé mak diak para solusiona situasaun iha rai laran.

“Ami ho toda vontade mai rona orientasaun saida mak Prezidente hato’o, ami husu bo’ot, liu-liu ba povu  joven sira hotu atu hakmatek, para ita hotu iha rai doben ida ne’e, ita hotu tenke rona Prezidente  nia orientasaun, maibé tenke mós ho vontade ida mai buka solusaun ho domin no dame, ami hato’o ona ami nia opiniaun por escritu iha ne’eba, depois haree lai evalusaun  ne’ebé mak partidu hotu hotu sei mai hato’o. razaun Prezidenti Partidu CNRT la partisipa, ami entrega mós hotu ona husi karta Prezidente Repúblika ”, katak Lay.

Bainhira Jornalista husu kona bá, deklarasaun Primeiru Ministru, Taur Matan Ruak nian ne’ebé hatete katak, AMP la eziste ona, Kalbuadi  subliña tuir, faktu AMP hari liu husi konferensia ne’ebé tuir lei eleitoral, konferensia husi partidu tolu, atu toma desizaun saida deit mós  tenke fila fali ba konferensia ida idak nian.oly