CNJTL: EA la’os solusaun rezolve impase polítiku ■Sujere Governu grande inkluzaun ba PR

Prezidente Konsellu Nasionál Juventude Timor-Leste (CNJTL-sigla portugés), Maria Dadi Magno, hatete, CNJTL fó fiar tomak ba Prezidente Repúblika, Francisco Guterres Lú Olo atu hakotu impase polítiku, maibé labele desidi ba Eleisaun  Antesipada (EA), tanba la’os solusaun ideal hodi  rezolve impase polítiku.

Maria Dadi Magno, mos hatete,  bainhira PR Lú Olo dekreta ba ba EA sei laiha partidu ida mak manan maioria.

“Konsellu Nasional Juventude Timor-Leste  afirma pozisaun katak,  modalidade hirak ne’ebé mak ita haree husi parte konstituisaun legal, sé ita ko’alia kona bá eleisaun antesipada, ha’u hanoin situasaun ne’e halo la’os tempu no dalan ba solusaun ne’ebé ideal  liu ba kontekstu atual”, dehan Prezidenti CNJTL, Maria Dadi Magno ba Jornalista sira, Tersa (04/02/2020), hafoin remata diálogu ho Prezidente Repúblika, Francisco Guterres Lú Olo, iha Palásiu Prezidensial Bairo Pité Díli.

Dadi Magno haktuir, analiza ba efeitu  no mós risku, eleisaun antesipada sai dalan ida ne’ebé legal, maibé la’os dalan úniku atu resolve impase ne’e.

“Pozisaun CNJTL sei opta nafatin Governu Grande Inkluzaun, no eleisaun antesipada atu iha mós,  rezultadu sei hatudu nafatin laiha partidu  ida mak manan maioria,  tanba de faktu hatudu solusaun antesipada la fó solusaun ida,  wainhira boa vontade, husi polítiku nain sira,  nafatin kontinua laiha konsistensia atu hateke kona bá objetivu Estadu. Klaru katak, ita-nia misaun no vizaun importante mak povu moris diak,  hakmatek no povu  moris iha justisa sosial,  ha’u hanoin ida ne’e mak importante, hato’o  ba nai Prezidenti,  hanesan organizasaun la impoin ba desizaun Prezidente Repúblika nian, hanesan organizasaun mós, afirma desizaun no fó apoiu ba nai Prezidente, wainhira hola desizaun fiar katak, desizaun ne’e sei ba bem komum, no ba interese Estadu no nasaun ida ne’e”, tenik Dadi.

Atual Prezidente  CNJTL ne’e subliña, tempu badak CNJTL  sei ba hasoru mós líder polítiku sira, tenke ko’alia  frankamente katak, haree husi prespetiva parte polítiku  problema kiik oan, problema mak lider sira la tu’ur hamutuk hodi halo komunikasaun.

“Lori ba líder nasionál sira, hanesan jerasaun foun hakarak hatete ba líder sira labele kria presedente  ne’ebé ladiak, liu-liu sai kultura ne’ebé  ladiak ba ita, imajen ne’ebé ladun diak tanba, postura, dedikasaun, jenorozidade, komitmentu  ba Estadu  ne’e sem rezerva, ha’u alin ha’u ki’ik tanba ne’e ha’u hakaraik aan atu bolu ha’u nia maun sira, mai ita hamutuk hodi rezolve problema rai laran, liu-liu mak lideransa rezistensia sira hanesan Maun Xanana, Ramos Horta, Taur Matan Ruak, Lere Anan Timur, no atual Prezidente Repúblika Lú Olo, atu hasai tiha roupa partidu  nian, no  tu’ur hamutuk hodi solusiona impase ne’e”, hakotu Dadi.oly