Deputadu balun entrega hikas kareta ba sekretariadu PN

Deputadu Partidu Demokrátiku (PD), Mariano Assanami Sabino ho Deputadu Partidu Kmanek Haburas Unidade Nasionál Timor Oan (KHUNTO), Antonio Verdial Sousa, entrega hikas kareta ho marka Pajero Sport ba iha Sekretariadu Parlamentu Nasionál (PN).

Tuir, Sekretaria Jerál Parlamentu Nasionál, Cedelizia Faria dos Santos, katak, nia simu ona karta husi deputadu Assanami entrega fila fali kareta ne’ebé entrega ona ba sira, maibe deputadu Verdial entrega hodi troka fali ho kareta seluk.

“Sim, ita bo’ot sira hetene katak total kareta foun ne’ebé ita sosa hamutuk 30 viaturas, maibe iha deputadu nain 2 maka fo fila fali sira nia viatura, deputadu ida nia fó fali pois nia simu fali prado ida, tanba nia dehan katak Pajero Sport, nia prefere liu prado entaun ita bele fó fila fali, iha mós deputadu bankada  PD nian, hau hanoin ita bo’ot sira mós hatene deputadu Assanami mós iha dia 11, Tersa feira ne’e ami mós simu ona karta entrega fila fali kareta Pajero Sport ida ne’ebé maka foun”, hateten, Cedelizia Faria ba Jornalista sira, Sesta (14/02/2020), iha Parlamentu Nasionál.

Cedelizia akresenta liutan, maske deputadu Assanami entrega ona kareta ba Parlamentu Nasionál, maibe wa’inhira deputadu ne’e hala’o servisu iha munisipiu bele halo pedido hodi oferese kareta viajen nian.

“Karta mós entrega tiha ona viatura mós entrega ona, iha karta deputadu, dehan deit katak uluk sai ona membru Governu iha responsabilidade rasik ba nia án, para atu buka kareta ba nia uza  ida ne’e mak razaun. Husi bankada KHUNTO nia entrega fali kareta mas nia foti fali kareta seluk, ne’e laos entrega la foti fali lae…? Entrega hanesan troka deit, agora deputadu Assanami nian maka entrega no la husu troka.Oras ne’e dadaun deputadu Assanami bainhira mai halo atividade iha parlamentu nia uza kareta privadu, maibe bainhira lao viajen hanesan komisaun, foin  halo pedido mai iha sekretariadu  bele oferese kareta para bele uza”, esplika, Cedelizia Faria.

To’o notisia ne’e públika, Jornalista GMN seida’uk hetan konfirmasaun husi deputadu sira ne’e, tanba laiha fatin.Jen