JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

EA la garante atu solusiona impase polítiku  Ejize konsiensia líder nasionál sira

EA la garante atu solusiona impase polítiku  Ejize konsiensia líder nasionál sira

Deputadu bankada Partidu Demokratiku, Adriano do Nascimento kontinua ezije lideransa nasionál sira atu promove diálogu, hodi salva lalais povu no nasaun nia moris, liu husi aprovasaun Orsamentu Jerál Estadu (OJE), la’os Eleisaun Antesipada mak atu rezolve problema, tanba Eleisaun Antesipada (EA) ne’e la garante atu solusiona impasse polítiku iha rai laran, tanba sei laiha partidu ida mak atu manan maioria absoluta.

Nune’e, hafoin EA mós partidu sira sei presiza nafatin atu tu’ur hamutuk hodi forma koligasaun.

“Buat ida ko’alia ba malu ne’e, atu hakerek iha konstituisaun ka la’e, ne’e ita tenke ko’alia hamutuk duni, kuandu iha problema,

Agora dadauk ne’e nasaun iha problema bo’ot, tanba laiha osan, deputadu sira la aprova osan, ne’e fó impaktu ba povu no nasaun nia moris, sei lakohi ko’alia ba malu, lakohi diálogu ne’e labele, tanba ne’e mak PD sempre hateten katak, dalan úniku líder sira tenke diálogu, tenke ko’alia ba malu, para oinsa bele aprova osan, serake ita ba EA ou husik de’it hanesan ne’e, povu ho nasaun ne’e moris oinsa, tanba ne’e, ami-nia pozisaun ami hakarak líder sira tenke ko’alia ba malu, ami-nia pozisaun mós hakarak katak, ko’alia ba malu, hodi salva nasaun, Eleisaun Antesipada ne’e ita rai lai, ne’e rekursu ikus, hanesan Timor-oan ita ko’alia ba malu ba para atu salva nasaun ne’e ho aprovasaun osan lai ba povu, tanba emprezáriu sira mós hein hela sira nia osan, tusan nab-naban, juta atus resin, depois povu servisu laiha, tanba projetu oan ruma mós laiha, ne’eduni ita rezolve lai, lalika ko’alia lai kona-bá EA, tanba eleisaun hotu mai mós hanesan de’it, partidu hirak oan ne’e mak mai, sei laiha manan maioria, ida mak manan maioria, se ita la ko’alia agora mak eleisaun mai mak kuandu lakohi fó ulun ba malu nafatin, entaun ita tenke eleisaun antesipada tan. Demokrasia ne’e sim, maibé povu ho nasaun nia moris ne’e indiskutível, demokrasia lori ita para atu responde povu ho nasaun nia moris ne’e, halo povu atu moris di’ak, la’os demokrasia be líder ida-idak ho nia egoismu fó kotuk ba malu, depois ba de’it mak eleisaun-eleisaun hela de’it. EA ne’e bele solusiona, maibé ida ne’e dalan ikus liu, tanba ita eleisaun tiha mai mós partidu ne’e sempre tau hamutuk nafatin, ha’u tauk mak eleisaun mai oituan-oituan depois fó kotuk ba malu fali, depois ba EA tan. Ita halo rekonsiliasuan ho Indonézia, depois nusa mak ita ho ita labele, serake povu ho agora ne’e moris sofre hela, povu presiza osan, ne’eduni eleisaun ne’e hanesan de’it, ha’u lafi’ar partidu ida atu manan kedas kadeira 50 ou 33, depois ita estraga osan ba EA, maibé povu agora sei moris terus hela, depois rezultadu mai partidu sira bolu malu lakohi malu fali tan, ba eleisaun tan, situasaun sei kontinua nafatin”, deklara deputadu PD ne’e ba jornalista sira, iha PN, Sesta (31/01/2020)

Lee hotu :   Kareta foun PN kontinua uza xapa privadu

Iha sorin seluk, nu’udar veteranus ida, deputadu David Diaz Mandati ezije konsiensia líder másimu sira, hanesan Kay Rala Xanana Gusmão, Francisco Guterres Lú Olo, Taur Matan Ruak no José Ramos Horta, atu bele tu’ur hamutuk, husik arogansia polítika ba kotuk, hakotu ona impasse polítiku ne’e, tanba promessa barak ba povu seidauk konkretiza, no mártires balun nia oan sira sei kontinua moris sofre.

“Ida-idak defende nia polítika, ida-idak buka nia razaun, maibé razaun sira ne’e ita buka para konkretiza seguransa, justisa no bem estar, tolu ne’e sai hanesan hakekat (essensia_red) nu’udar hamoris ita-nia Estadu, loloos ne’e tu’ur hamutuk, para haree, diferente ne’e iha ne’ebé, no hanesan ne’e iha ne’ebé, para depois ita labele nafatin  de’it hanesan ne’e, tanba kuaze tinan rua ne’e ita mak problema hela de’it ne’e ladi’ak, ema nasaun seluk hamnasa ita. Ita hanesan ne’e, koruptu ita-nia dignidade Estadu nian, ita tenke atensaun mós ba buta sira ne’e. Maun bo’ot sira balun mós dala ruma ko’alia arbiru de’it, tanba se identifika impasse ne’e iha ne’ebé, ba ko’alia, la’os tu’ur hodi buka tan pozisaun, ko’alia tan ida ne’e, ne’e ladi’ak, di’ak liu mai ita ko’alia, ko’alia ne’e mak di’ak liu, lakohi tu’ur hamutuk ko’alia ita atu sai saída, ema hotu terus, uluk ba ai-laran ema nia sasán sira laiha hotu, ema balun mate, ohin loron ita la’o hamutuk, ita ko’alia kona-bá rekonsiliasaun to’o fali pontu ida ne’e, ida di’ak ne’e mak di’ak nafatin, ida be aat ne’e atu aat nafatin ka, ne’e laiha, tanba ne’e mak primeiru tenke iha seguransa, para depois justisa iha no moris di’ak ne’e. Tenke tu’ur hamutuk halo reflesaun hodi buka solusaun ba ita-nia problema sira ne’e”, tenik David.

Lee hotu :   ARNLV-Governu sei identifika veteranu falsu

Mandati mós konsidera, eleisaun antesipada, atu aumenta de’it povu nia sofrementu, tanba tenke ba forma hodi vota bebeik, maibé polítika nafatin lagarante katak, povu bele moris di’ak.

“Kuandu diálogu ita hotu kontenti, tanba saída mak ita lakohi diálogu, ida be lakohi diálogu ne’e, karik tanba sala ne’e husi ema ne’e mak lakohi diálogu ne’e, depois dada problema ne’e halo naruk ba bebeik. Serake ema sira be matenek ne’e presiza mediadór ka presiza sira-nia kesadaran (konsiensia_red), tenke sadar, rai ne’e la’os feudal, maibé rezultadu husi ran, matan been, no kosar been, tanba ne’e ita tenke valorize. Ita kuandu sama rai ne’e, tuir loloos ita-nia sentimentu iha, katak, sama hela ita-nia maluk sira ne’ebé mate, tanba barak sira ne’e nia oan sira de’it la sai buat ida, Uluk ema rezistensia nia oan sira atu eskola de’it defisíl, maibé agora hotu-hotu bele, dalaruma ema ida la’os rezistensia nia oan mak di’ak liutan fali, tanba de’it demokrasia. Uluk ema sira hakarak merdeka ne’e, nia konsekuensia mak mate, tuku, tebe, no terus oi-oin, ne’e opsaun no konsekuensia, maibé sira seluk hakarak fila kanan mós di’ak no karuk mós di’ak hela de’it, buat hotu di’ak hotu de’it. Ha’u husu de’it sira hotu-hotu nia konsiensia, sira hotu-hotu nia kesadaran rasik, sadar ba matebian sira ne’ebé mate tan rai ne’e nia oan sira ne’ebé to’o ohin loron sei terus ne’e, inklui ba ita-nia jerasaun foun, antes ita mate, ita bele fó hela buat di’ak ruma. Tanba saída mak, eleisaun antesipada ida horseik no horbainrua ne’e de’it seidauk bele rezolve problema, agora hakarak tan eleisaun antesipada ne’e, ita goza povu ne’e ka, povu ba hamriik hodi forma, ate balun monu tan, depois ita hakarak tan mak ida ne’e tan, ne’e laiha lójika ida, CNRT nia hakarak mak ida ne’e, laloos, tanba CNRT ne’e moris ho naran Kongresu  Nasionál Rekonstrusaun Timorense, rekonstrusaun ne’e, rekonstrusaun mentalidade ida odíu malu ninian ka, rekonstrusaun oportunizmu nian,  ne’e hamutuk kedan iha ne’ebá, labele ki’ik bo’ot ita ba eleisaun, povu ne’e agora dadauk atu halo netik sira-nia toos no natar mós defisíl ona, depois lor-loron mak haruka sira ba vota de’it vota de’it, Nusa la tu’ur hamutuk hodi ko’alia ba malu de’it, nusa mak ema ida ko’alia loos ne’e ita lakohi rona, hakarak ita-nian mak loos de’it, tanba saída, keta hanesan ne’e. Uluk ita promete ba ita-nia povu ne’e buat oi-oin de’it, maibé agora buat barak mak ita la halo tuir. Agora ne’e, ita nia sosiedade agora ne’e, ada yang hidup di langit dan ada yang bernafas di lutut, Ita haree iha Díli laran ne’e, uma andar bar-barak, maibé ita ba foho took, kuitadu ho ita-nia povu sira.”tenik, Diaz.

Lee hotu :   PN ho TC-BCTL diskute alterasaun lei atividade petróliferu

Nune’e, deputada bankada KHUNTO, Olinda Guterres deklara, AMP sei ejiste, tanba seidauk deklara ofiasialmente husi líder partidu polítiku, hanesan CNRT, KHUNTO inklui PLP rasik, maske Primeiru Ministru Taur Matan Ruak nu’udar prezidente PLP deklara, AMP rahun tiha ona.

Tanba ejistensia AMP deklara hafoin konferensia no liu hosi líder na’in tolu nia deklarasaun, la’os PM Taur Mesak de’it.

“Sekarik dehan governu monu ona, entaun PR tenke tau fali Primeiru Ministru foun, hodi assegura nasaun ne’e, deklarasaun ne’e nia (PM Taur) mesak ko’alia, uluk AMP ne’e harí la’os PM Taur Matan Ruak mesak mak tu’ur, iha mós maun bo’ot Kay Rala Xanana Gusmão no iha mós konselleiru Partidu KHUNTO, José dos Santos Naimori Bukar,  ne’e seidauk loos, kuandu iha konferensia ruma mak dehan katak, la hamutuk ona ho CNRT ne’e oin seluk”,hateten deputada AMP ne’e.

Hafoin proposta OJE ba tinan 2020 la passa iha Parlamentu Nasionál, Prezidente Repúblika Francisco Guterres Lú Olo konvida ona partidu polítiku sira ne’ebé hetan asentu iha PN hodi rona hanoin, antes foti desizaun ba impasse polítiku ne’e.Say

Add to Comments Here!!!!

error: Content is protected.
Secured By miniOrange
You might also like:
Diálogu ho fuan mak bele solusiona impase polítiku

Konfisoens Relijiozu sira iha Timor-Leste, ne’ebé...

Igreja katólika husu líder polítiku sira tenke rekoñese sala

Igreja katólika husu ba lider polítiku...

Kandidatu estudante pasa ba UNTL no IPB 4.211

Kandidatu estudante ne’ebe asesu ba Universidade...

Close