PPN rejeita informasaun kona-bá atu rezigna-an

Prezidente Parlamentu Nasionál (PPN), Arão Noe de Jesus da Costa Amaral konsidera, informasaun ne’ebé espalla iha públiku, kona-bá nia atu rezigna aan  husi kargu nu’udar Prezidente PN, hanesan espekulasaun públiku de’it, tanba nia eleitu husi dalan formal, no sai mós husi dalan formal.

“Ida ne’e husu ema ida ne’ebé deklara informasaun ne’e, sim iha duni preokupasaun balun, husi telephone, média sosial, iha komentáriu katak, ha’u atu halo deklarasaun ba rezignasaun, maibé ha’u seidauk hanoin to’o iha ne’ebá, negosiasaun diálogu PR sei organiza hela, ne’eduni ita hein de’it, polítika saída mak atu akontese, ha’u lahatene informasaun ne’e se mak so’e, liga ho asuntu ne’e, dalaruma ema ruma mak hakarak halo espekulasaun, ha’u atu dehan de’it katak, eleitu tuir dalan formal, karik sai mós, sai ho formalmente”, tenik Arão Noe.

PPN ne’e afirma, kona-bá situasaun polítika atu sai oinsa, hotu-hotu hein de’it desizaun ikus ne’ebé Xefe Estadu sei fó sai iha tempu badak, hodi hakotu inserteza polítika ne’e.

“Hein prosesu agora la’o hela, PR sei halo hela konsulta, ita hein de’it”,subliña Arão Noe.

Iha sorin seluk, Vise Xefe bankada FRETILIN, deputadu Francisco Miranda Branco mós konsidera, informasaun kona-bá pozisaun Prezidente Parlamentu Nasionál nian, hanesan boatus ida ne’ebé espalla hela iha públiku.

“Nia PPN ko’alia tiha ona katak, informasaun ne’e boatus de’it”, reforsa deputadu opozisaun ne’e.

Antes ne’e, informasaun balun espalla iha mádia sosial katak, Prezidente Parlamentu Nasionál, Arão Noe de Jesus da Costa Amaral sei rezigna aan husi nia kargu nu’udar PPN, antes Xefe Estadu Francisco Guterres Lú Olo foti desizaun.say