Semana oin, PR Lú Olo hasoru Xanana Gusmão

Hafoin rona tiha partidu polítiku,  organizasaun no institusaun sira iha nasaun ida ne’e, Prezidente Repúblika (PR), Francisco Guterres Lú Olo tuir planu mos sei konvida no prezide enkontru ho líder istóriku Kay Rala Xanana Gusmão no personalidade sira seluk iha 10 fevereiru 2020, hodi rona sira-nia hanoin  kona-ba situasaun polítiku-konstitusionál rai-laran ninian.

Tuir komunikadu imprensa ne’ebé mak GMN assesu husi média Prezidénsia Repúblika, iha Kuarta (5/2/2020), informa katak, líder istóriku  no personalidade sira ne’ebé Xefe Estadu konvida kompostu husi  Eis-Prezidente Repúblika no Eis-Primeiru-Ministru, Kay Rala Xanana Gusmão, Eis-Prezidente, José Ramos Horta, Eis-Prezidente no atuál Primeiru-Ministru, Taur Matan Ruak,  Eis- Primeiru Ministru, Mari Alkatiri, Xefe Estadu-Maior-Jenerál F-FDTL, Majór-Jenerál Lere Anan Timur no veteranu Roque Rodrigues.

“Hamutuk ho líder no personalidade hirak ne’e, Xefe Estadu sei “halo análize no identifika opsaun sira ne’ebé di’ak liu hodi hadi’a situasaun polítiku konstitusional atual”, tenik komunikadu ba imprensa ne’e.

Komunikadu ne’e mos refere katak, hafoin rona opiniaun líder históriku sira, ikus liu Xefe Estadu mós sei rona no tetu hanoin sira hosi ninia órgaun konsulta Konsellu Estadu molok foti desizaun relasiona ho situasaun polítiku-konstitusionál ne’ebé oras ne’e nasaun hasoru.

“Prezidente Repúblika kompromete atu nafatin hala’o diálogu hodi rona hanoin husi líder no sidadaun sira atu ema hotu hamutuk lori polítika dezenvolvimentu  ba  povu tomak nia bem-estar no justisa sosiál”, esplika komunikadu imprensa ne’e.*/oct

Leave a Reply

Your email address will not be published. Required fields are marked *