Limita liberdade sirkulasaun komunidade, PM Taur: Presiza iha Estadu Emerjénsia

Primeiru Ministru (PM), Taur Matan Ruak hatete, atu limita liberdade sirkulásaun sidadaun nian, hodi evita aan husi Corona Virus Disease 2019 (COVID-19), presiza aplika Estadu emerjensia.

“Governu sente katak sei fó kbiit liu ba Governu para bele iha kbiit atu restrisaun liberdade sirkulasaun, no liberdade sira seluk ita nia sidadaun nian, que só ita halo bainhira Estadu Emerjénsia no kazu kalámidade públika, ne’e presiza tebes. Tanba ne’e membru Parlamentu Nasionál ami presiza ita bo’ot sira-nia apoiu, no ita hotu nia apoiu para bele enfrenta ameasa no risku ida ne’e”,deklara Xefe Governu, Taur Matan Ruak, iha PN, Kinta (26/03/2020).

Governante ne’e hatutan, mensajen husi Xefe Estadu hateten momentu ida diak lós para Timor-oan hotu hamutuk, labele soe momentu ida ne’e ba kotuk, ne’e úniku, tanba moras lá haree ba ema ida, tanba ne’e diak liu hotu hamutuk.

“Reuni ita-nia kapasidade no forsa, para enfrenta situsaun ida ne’ebé sei atinji, la’os ita deit maibé iha responsabilidade bo’ot, ba ita nia nasaun liu-liu, ita nia Inan-Aman sira, maibé liu-liu ita nia ajente saúde sira, tanba ita bo’ot sira hatene, iha funu tropa mak iha oin, maibe iha funu ida ne’e médiku no enfermeiru sira mak iha oin”, haktuir, PM Taur.

Governante ne’e subliña, tuir estatístika porsentu 1 husi médiku mak mate iha país sira ne’ebé afetadu. Tanba ne’e Primeiru Ministru hanoin ho respeitu no solidariedade ba sira, Governu no hotu-hotu tenke hamutuk dudu husi kotuk, para enfrenta dezafiu ida ne’e.Cin