Ohin PN debate pedidu Estadu Emerjénsia

Prezidente Parlamentu Nasionál (PN), Arão Noe, subliña, ohin (Kinta-red) PN halo debate ba pedidu Estadu Emerjénsia ne’ebé simu husi Prezidente Repúblika (PR), Francisco Guterres “Lú Olo”.

“Ami prepara nota téknika husi tékniku sira, reuniaun líder bankada deside aban sei hato’o karta ofisiál ba Primeiru Ministru (PM), tanba tuir rejimentu PN, artigu 19 tenke iha prezensa husi PM. Estadu Emerjénsia ha’u dehan tiha ona katak, tenke iha komunikasaun ho PM tuir rejimentu hateten ona hanesan ne’e, tékniku sira tenke halo pareser”, Prezidente PN ne’e ba jornalista sira iha PN, Tersa (25-03-2020).

Xefe Órgaun Lejislativu ne’e hateten, bele PN autoriza mós tenke haree prosedimentu sira, nune’e labele kria problema tama em vigor, ho nune’e reuniaun líder bankada deside ona halo debate iha plenária.

“Halo debate ba Estadu Emerjénsia ne’e, tuir rejimentu loron ida de’it, atu labele kleur liu no iha de’it intervensaun PM, aprezentasaun hafoin intervensaun bankada ida-idak, depois halo aprovasaun, tenke liu husi votasaun, votasaun tenke nominál deputadu ida-idak deklara nia votu”, tenik Arão.

Pedidu Estadu Emerjénsia ne’e, PN simu husi PR Lú Olo, iha loron 24, fulan Marsu ne’e.

Enkuantu Governu haruka pedidu ne’e ba PR, iha loron 23 no iha loron 24 fulan Marsu ne’e PR haruka fali ba PPN atu halo diskusaun. ety