JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Partidu neen kompleta ona rekezitus koligasaun ■ Prefere Xanana lidera Governu dasía

Partidu neen kompleta ona rekezitus koligasaun ■ Prefere Xanana lidera Governu dasía

Partidu neen ne’ebé forma koligasaun foun hanesan Partidu CNRT, KHUNTO, PD, PUDD, UDT, Frenti Mudança, halo ona kongresu no mos konferénsia estraordinária hodi responde ba ezijensia Prezidente Repúblika (PR), Francisco Guterres Lú Olo nian ne’ebé hatete partidu neen ne’e presiza kompleta rekezitus hodi refere ba lei partidu polítiku antes forma koligasaun foun.

Partidu Congresso Nacional Reconstrução Timor-Leste (CNRT)  lideradu Kay Rala Xanana Gusmão, iha Sábadu (7/3/2020) hala’o konferénsia iha Bairo dos Grilhos, Díli, hamosu rezolusaun únika ho pontu importante lima hodi responde ba ezijénsia ne’ebé prezidente Repúblika husu molok forma governu foun.

“Konferénsia Nasional Partidu CNRT, iha nia sorumutu loron 7 fulan Marsu tinan 2020, iha sede Partidu CNRT, Bairro dos Grilhos, hodi haktuir dispostu iha alínea B, númeru 3, artigu 27 iha estatutu partidu CNRT, no hodi kumpri ba dispostu iha  númeru 1 artigu 106 Konstituisaun Repúblika Demokratika Timor Leste, delibera pontu importante lima”,dehan Adérito Hugo da Costa ba Jornalista sira, iha sede CNRT Bairro dos Grilos, Díli.

Hugo haktuir, pontu lima ne’e hanesan: ida, afirma vontade polítika Partidu CNRT atu responde ba rezultadu husi enkontru lider nasional, iha loron 10 fulan Fevereiru tinan 2020; rua, reafirma pozisaun Partidu CNRT hodi mantein iha Aliansa Maioria Parlamentar (AMP), ne’ebé forma iha Fulan Juñu tinan 2018.

Enkuantu tolu aprova hamutuk ho Partidu KHUNTO kompozisaun foun ba Aliansa Maioria Parlamentar hodi akomoda vontade polítika ne’ebé espresa husi PD, PUDD, UDT, FM, atu hola parte iha Aliansa Maioria Parlamentar, hodi hamosu konjuntura polítika foun, atu bele hakotu  impase polítiku ne’ebé akontese iha Timor-Leste.

Enkuantu haat, reafirma ninia  apoia total ba deklarasaun konjunta ne’ebé asina husi Prezidente FM, UDT, PUDD, PD, KHUNTO no CNRT, iha loron 22  de Fevereiru 2020 , iha Sede Partidu CNRT, no lima Rezolusaun ne’e hahú vigora no produs efeitu, iha loron 7 fulan Marsu tinan 2020.

“Ami nia diskusaun iha Partidu CNRT ninian ne’e mak asuntu ne’e duni, entre asuntu barak ida ami-nia preokupasaun mak ida ne’e katak, rekezitus ida ne’e akontese deit ba inisiativa boa vontade Partidu CNRT ninian atu kontribui fó solusaun ba impase polítiku ne’ebé iha hodi hetan konfiansa husi Partidu sira seluk, atu forma Aliansa Maioria Parlamentar, no aprezenta iha loron 27 fulan Fevereiru, no iha loron 6 mak Prezidente Repúblika iha tempu atu simu aliansa ne’e, ne’ebé lidera husi Prezidente Partidu CNRT, Kay Rala Xanana Gusmão”,afirma Adérito.

Nia subliña, rekezitus ne’ebé Prezidente Repúblika tau halo supreza ba públiku, tanba rekezitus hanesan la uza ba koligasaun ida akontese iha eleisaun 2017 nia rezultadu, ne’ebé Partidu FRETILIN ho koligasaun Partidu Demokrátiku tenta forma governu  minoritáriu ida rekezitus sira ne’e  la tau hotu, inklui rekezitus ida mak presiza konferénsia.

“Hafoin prosesu hotu la’o kompleta hotu konferénsia  internal partidu ida idak nian, sei to’o ba konferénsia hamutuk hodi hetan akordu konjunta ida, antes lori ba Prezidente Repúblika”,tenik Hugo.

Hugo mos fundamenta liu tan katak, koligasaun foun ne’e la inklui Partidu Libertasaun Popular lideradu Taur Matan Ruak.

PD hala’o ona konferénsia apoia koligasaun foun

Nune’e mos, Partidu Demokrátiku (PD) lideradu Mariano Asanami Sabino ho Sekretáriu Jerál, António da Conceição “Kalohan” antes ne’e iha loron 20, fulan fevereiru, tinan 2020 ne’e halo tiha ona konferénsia estraordinária ne’ebé partisipa husi kuadru partidu husi Munisípiu 12 inklui Rejiaun Administrativa Espesiál Oecusse Ambeno (RAEOA) hodi deside ba hamutuk ho partidu CNRT forma koligasaun foun hodi hakat liu impase polítiku ne’ebé fó kauza ba ekonomia rai-laran, la’o hakdasak.

Lee hotu :   DIONISIO: XANANA HAREE BA INTERESE NASIONAL  BELE IMPLIKA BA ESTABILIDADE GOVERNATIVA

“PD firme no hakruk nafatin hodi fó respeitu ba líder istóriku sira hotu inklui Maun Lú Olo, Marí, Ramos Horta, Maun Xanana no Maun Taur,” Asanami hatete ba Jornalista sira hafoin konferénsia PD, iha Sede Nasionál PD, Kolmera, Díli.

KHUNTO deside la’o hamutuk ho CNRT

Husi Partidu Kmanek Haburas Unidade Nasional Timor Oan (KHUNTO) mos hala’o ona kongresu nasionál ne’eb’e partisipa husi kuadru partidu husi Munisípiu 12 inklui RAEOA hahú husi dia 6-8, fulan Marsu, tinan ida ne’e, hodi reestrutura partidu no mos hodi la’o hamutuk ho Partidu CNRT ba forma Governu foun tuir ezijénsia husi PR Lú Olo ninian.

Partidu KHUNTO aprova rezolusaun númeru 4/ II kongresu nasionál tinan 2020 hodi priense rekezitus koligasaun nian. Rezolusaun ne’e ofisialmente deklara husi prezidente partidu KHUNTO, Armanda Berta dos Santos, liu husi konferénsia imprensa iha Sentru Konvensaun Díli, Sábadu (7/3/2020).

Armanda Berta hateten, ho sentidu estadu no responsabilidade morál polítiku, KHUNTO deside ona la’o hamutuk ho CNRT hodi hakotu impase polítiku ne’ebé lori konsekuensia boot ba vida ekonomia no sosiál ba povu no Estadu Timor-Leste.

“Partidu KHUNTO liu hosi kongresu nasionál daruak 2020, deside iha rezolusaun nú 4/KN-P.KHUNTO/ 2020, hodi hola parte integralmente iha koligasaun polítiku hamutuk ho partidus polítiku ho asentu Parlamentar, hodi viabiliza formasaun IX governu konstitusional, tuir mata dalan konstituisaun da Repúblika Demokrátika de Timor-Leste.

Koligasaun polítika ne’ebé refere iha rezolusaun nú 4/KN-P.Khunto/II/2020 Partidu Khunto nian mak hanesan, CNRT,Khunto, PD, PUDD, UDT ho FM, ho objetivu final, hakotu impase polítika no asegura estabildade governativa iha rai doben RDTL.” Dehan Prezidente KHUNTO, Armanda Berta dos Santos.

Iha Sesta (6/3/2020), koligasaun foun ne’ebé forma husi Partidu CNRT, KHUNTO, PD, PUDD, UDT no Frenti Mudança hasoru malu ona ho xefe Estadu Francisco Guterres Lú Olo, hodi aprezenta ezisténsia koligasaun foun maibé Prezidente Repúlika konsidera koligasaun foun ne’e seidauk priense rekezitus atu forma governu foun. Tanba ne’e portavoz koligasaun foun, António da Conceição “Kalohan” hatete katak, iha semana ne’e nia laran koligasaun foun sei entrega fali karta ba PR Lú Olo hodi toma konsiderasaun.

PUDD: Koligasaun foun sei hakotu impase polítiku

Partidu Unidade dezenvolvimentu Demokrátiku (PUDD) iha Domingu (8/3/2020), hala’o ona konferénsia estraordinária ne’ebé partisipa máximu husi kuadru partidu husi Munisípiu 12 inklui RAEOA atu bele la’o hamutuk ho partidu CNRT ba forma Governu foun (Governu dasía) hodi hakotu impase polítiku ra-laran ninian.

Liu husi konferensia extraordenáriu Partidu Unidade Dezenvolvimentu Demokratiku (PUDD) deside ho aklamasaun hodi reafirma pozisaun atu involve iha koligasaun foun hodi forma Governu da sia.

PUDD realiza konferensia nasional estraordináriu ne’e hamosu rezoluasaun ida ho númeru 001/PUDD/III/2020 deside hodi envolve iha koligasaun foun ho partidu sira hanesan CNRT, KHUNTO, PD, UDT no Frente Mundansa  atu hetan Aliansa Maioria parlamentar hodi forma IX governu.

Lee hotu :   PPN konsidera aktu deputada nain rua afeita ba dignidade instituisaun

Prezidente Oragaun Profesional PUDD, Alberto de Carvalho Araujo ne’ebé sai nu’udar porta voz ba konferensia ne’e hateten, Partidu hili dalan ida ne’e hodi solusioan impase politika ne’ebé lao durante tinan 3 ona.

“Atu Solusiona Impaase politika, presiza duni koligasaun foun entre partidu politiku sira ne’ebé iha asentu parlamentar hodi forma koligasaun foun ida atu hetan Aliansa Mairoia Parlamentar iha Parlamentu Nasional hodi forma IX governu konsituisional atu solusiona impaase politika,” dehan Alberto iha Hotel Vila-Verde iha Konferensia Nasional Extraordinariu PUDD, Domingo (08/03/2020).

FM prontu apoia koligasaun foun hodi forma Governu XI

Membru Komisaun Jurídiku partidu Frenti-Mudança (FM), Daniel Pereira, deklara, FM prontu apoia koligasaun foun, ne’ebé lidera husi Kay Rala Xanana Gusmão, hodi hatán ba pedidu Prezidente Repúblika (PR), Francisco Guterres “Lu Ólo” ni’an.

Bazeia ba K-RDTL katak, PM sei indijitadu husi partidu mais votadu ka aliansa partidu polítiku sira ne’ebé iha maioria parlamentar, nune’e konsidera ba lei Partidu Polítiku (PP) ni’an, liu-liu artigu 9 númeru 1 no 3 lei númeru 03/2004, 14 Abril ne’ebé alteradu ho lei númeru 02/2016, 3 Fevereiru, haktuir ba baze legál sira ne’e no konsiderasaun sira ne’ebé temi ona iha leten, liu husi konferénsia extra-ordináriu ne’ebé realiza iha loron ohin (8/3) hato’o katak, ida, solisita ba PR nu’udár aman ba povu tomak, Dr. Francisco Guteres Lu Ólo atu ho konsisténsia hakotu impase polítika iha rai-laran ho vizaun estadista ni’an hodi valoriza pontu rua rezultadu enkontru ho líderes nasionais iha loron 10, fulan Fevereiru, tinan 2020, rua, FM nu’udár PP ne’ebé ho kadeira ida iha PN, kaer prinsípiu demokrátiku katak, minoria submete maioria, tanba ne’e, la ezije atu hetan kadeira iha Governu, maibé afirma vontade polítika ba partidu CNRT, liu-liu ba maun boot Xanana Gusmão no partidu sira seluk ne’ebé hamutuk ona iha koligasaun foun, atu kontinua nafatin iha AMP hodi responde ba rezultadu husi enkontru líder nasionál, reafirma ho apoiu totál ho unanimidade ba deklarasaun konjunta ne’ebé asina husi Prezidente partidu FM, UDT, PUDD, PD, KHUNTO no CNRT”, membru Komisaun Jurídiku FM ne’e liu husi konferénsia estra-ordináriu partidu Frenti-Mudansa (FM), iha Otél Arbiru Beace, Bebonuk-Díli, Domingu (08-03-2020).

Sekretáriu Jerál (SekJer) FM, Ricardo Cardoso Nheu, akresenta, alvu prinsipál husi apoiu koligasaun foun hodi forma Governu dasía (XI) mak, hakotu impase polítika ne’ebé sempre hatodan povu-nia moris.

“FM laiha objetivu prinsipál atu ba buka kadeira, importante mak solusaun ba impase polítiku, agora kadeira ne’e buat seluk ida, solusaun mak importante, sé FM mak hanoin kadeira mak FM sei la hakraik-an, tanba FM haluha pasadu ne’ebé la di’ak no hakarak mai buka solusaun ho partidu boot sira atu lori moris di’ak ba povu”, tenik SekJer FM ne’e.

Antes ne’e, koligasaun foun ne’ebé forma husi partidu CNRT, PD, PUDD, FM, UDT no KHUNTO aprezenta ona ba Xefe Estadu, iha loron 6, fulan Marsu, tinan ne’e, maibé Xefe Estadu deside, koligasaun foun politikamente legál, maibé jurídikamente seidauk prense rekizitu legál partidu polítiku ni’an.

PR la obriga FRETILIN-PD halo konferénsia        

Entretantu, kuadru partidu CNRT atuál deputada bankada CNRT iha Parlamentu Nasionál, Carmelita Moniz, deklara, Prezidente Repúblika (PR), Francisco Guterres Lú Olo, iha tinan 2017 liu ba la obriga koligasaun minoritária ne’ebé forma husi partidu FRETILIN ho Partidu Demokrátiku (PD), halo konferénsia internal partidu nian tuir lei partidu polítiku hatete, maibe fó kedas pose hodi forma Governu dahitu, iha ne’ebé estabilidade governativa la garantidu iha momentu ne’eba.

Lee hotu :   OJE billiaun US$1.2 sei selu dívida no garante funsionamentu Estadu

“Infelizmente ida ne’e so akontese deit ba partidu CNRT, tanba iha realidade saida mak akontese liu ba iha tinan 2017 kuandu koligasaun entre FRETILIN no PD, PR Lú Olo la preokupa ho rekezitus formal sira hanesan ne’e (konferénsia partidu hodi forma koligasaun foun). So akontese deit bainhira partidu CNRT halo ona aliadu ho partidu lima seluk no ba hasoru PR Lú Olo, no PR Lú Olo komesa ezije ona rekezitus formal sira ne’e. Mai ami ne’e inkonsisténsia PR Lú Olo nian. Maibe ba partidu CNRT hakarak hakotu impase polítiku iha rai-laran ne’e, ami iha iha obrigasaun atu halo konferénsia ida ne’e hodi responde ba ezijensia PR nian, mezmu iha FRETILIN ho PD nian liu ba ne’e sira la halo hanesan ne’e”,dehan tan Carmelita Moniz.

UDT prefere Xanana lidera Governu dasía

Entretantu konferénsia Partidu União Democrática de Timorense (UDT), reafirma nia pozisaun atu fó apoiu tomak ba koligasaun foun ne’ebé lidera husi Kay Rala Xanana Gusmão, hodi fó resposta ba pedidu Prezidente Repúblika, Francisco Guterres Lú Olo ninian.

Rezultadu husi konferénsia ne’e reafirma nia pozisaun integra ba koligasaun foun ne’ebé envolve CNRT, PD, KHUNTO, FM, PUDD no UDT rasik ne’ebé asina paktu koligasaun iha (2/3), iha sede CNRT Bairo dos Grilhos, Díli.

Prezidente Knua Profesional UDT, João Pereira, hatete, konferénsia ne’e atu reafirma pozisaun UDT nian ho klareza hodi fó apoiu tomak ba iha koligasaun foun ne’e, hodi nune’e bele hato’o hikas ba Prezidente Repúblika atu bele forma fila-fali IX Governu Konstitusionál.

“Atu informa ba udetista teritóriu laran tomak kona-bá pozisaun UDT nian iha momentu ida ne’e, apoiu tomak iha koligasaun ida ne’ebé lideradu husi maun bo’ot Kay Rala Xanana Gusmão ne’e para asegura uma boa governasaun ida di’ak no kualidade ba to’o 2023”,Prezidente Knua Profisional UDT, João Pereira, hatete, ba Jornalista sira hafoin hala’o konferénsia estraordinária, iha sede Nasionál UDT, Palapasu, Díli, Domingu (08-03/2020).

Entertantu Sekret’ariu Jerál UDT, Francisco David Xavier Carlos, esplika, pozisaun ne’ebé partidu UDT foti hodi hatán ba preokupasaun Prezidente Repúblika, Francisco Guterres Lú Olo, kona-bá legalidade koligasaun ne’ebé lidera husi Kay Rala Xanana Gusmão hodi hakotu impase politíka iha rai-laran ho formasaun Governu Da-sia ne’ebé metin.

“Konferénsia ne’e atu reafirma fila-fali UDT nian hamutuk ho koligasaun CNRT Kay Rala Xanana Gusmão, tanba ne’e pontu importante ne’ebé ami koalia iha konferénsia extraordinária ne’e ami atu fó sai ba munisípiu 12 inklui RAEOA oras ne’e dadaun ami fó apoiu tomak ba iha koligasaun ne’ebé lidera husi Kay Rala Xanana Gusmão, tanba UDT hakarak mós asegura governasaun ida ne’ebé diak no kualidade”,tenik atuál deputadu iha Parlamentu Nasionál Francisco David Xavier Carlos.

Konferénsia durante loron ida ne’e, partisipa husi Sekretáriu Ezekutivu husi munisípiu 12 inklui RAEOA, órgaun feto UDT, no órgaun juventude UDT.oly/say/tos/san/ida

Add to Comments Here!!!!

error: Content is protected.
Secured By miniOrange
You might also like:
Duarte Nunes acusa Alkatiri de influenciar decisões do PR

O chefe da bancada do Congresso...

Kazu Dengue Ermera sa’e ba 215, CVTL halo sosializasaun ba prevensaun

Cruz Vermelha Timor-Leste (CVTL), halo sosializasaun...

Espoza PR husu ba sosiedade hotu luta ba igualidade feto

Iha loron 8 fulan Marsu tinan...

Close