JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

PM Taur husu FRETILIN solusiona impase polítiku ■Alkatiri: Krizi hahú husi sistema

PM Taur husu FRETILIN solusiona impase polítiku ■Alkatiri: Krizi hahú husi sistema

Primeiru Ministru (PM), Taur Matan Ruak, hateten, nia parte sempre koalia ho Sekretáriu Jerál partidu FRETILIN, Mari Alkatiri hodi buka solusaun ba impase polítiku rai-laran, maibé Alkatiri fó resposta katak, FRETILIN hakarak iha 2023 hodi lakohi lakon tan tempu. 

“Ha’u sempre koalia bebeik ho doutor Mari buka solusaun maibé nia resposta, ha’u hakarak 2023 ha’u lakohi lakon tempu”,Primeiru Ministru, Taur Matan Ruak, hato’o lia hirak ne’e, iha nia diskursu ba kongresista sira iha Konferénsia Nasional Partidu FRETILIN, ne’ebé hala’o iha salaun Katedral Díli, Sábadu (14/03/2020).

Taur Matan Ruak hatutan, durante ne’e nia sempre husu disponibilidade partidu FRETILIN nian atu kolabora, hodi buka solusaun ba impase polítiku iha rai laran.

“Kongresista sira partidu FRETILIN nian ha’u hakarak FRETILIN proativu liu ajuda buka solusaun ba iha governasaun iha tinan oin mai ita la taka dalan ba eleisoes mais ha’u hatene ita nia populasaun sei iha pasiensia atu ita fila fali ba hakarak dala ida tan, ha’u agradese maun Mari nia prejensa no nai deputadu sira nia prejensa,” agradese, Taur Matan Ruak.

Taur Matan Ruak afirma liutan, relasiona ho situasaun polítika ne’e, nia aviza ona ba membru governu sira, inklui gabinete primeiru ministru atu aruma sasan antes fulan outobru tinan kotuk.

“Ha’u haree situasaun la diak ha’u akompañia ha’u nia gabinete desde outobru tinan kotuk sasan aruma kedas ha’u bolu membru governu hotu aviza ba sira hotu prepara sira nia relatoriu tanba ha’u fo hatene katak situasaun ne’e sei akontese ha’u dehan, ha’u hakarak salva orsamentu no salva AMP depois de orsamentu liu ha’u husu demisaun so ke dia 17 ao kontrariu ivez ha’u mak sai sira mak oho tiha ha’u”, dehan, Taur Matan Ruak.

Lee hotu :   TR simu lista kandidatura partidu koligasaun no individu 10

Impase polítiku ne’e, rezulta orsamentu jeral Estadu (OJE) tinan rihun rua rua nulu 2020 ho montante billaun $. 1.668, la pasa iha parlamentu nasional PN, tanba hetan votu abstensaun husi bankada CNRT ne’ebé hola parte mós iha governu da-ualu ne’e.

Alkatiri : Krize hahú husi sistema

Sekretáriu Jerál (SekJer) partidu Frente Revolucionária do Timor-Leste Independente (FRETILIN), Mari Alkatiri, konsidera, krize ne’ebé akontese iha Timor-Leste ne’e hahú husi sistema, tanba laiha definisaun klaru ba sistema konstroe no dezonvolvimentu nasionál.

“Ita presiza atu kondisaun moris loron kalan ni’an atu bele hadi’a kualidade moris no dook husi moras, tinan 18 ba kotuk ita restaura ita-nia independénsia hahú husi tinan 2007, ita fakar osan rezultadu laiha dada osan husi Tasi Mane, dudu ba Tasi Feto, mout iha Tasi Feto, ba ita osan hanesan ita hakoi de’it, ita la kuda atu bele buras, buras atu haburas ita-nia ekonómia atu hametin soberánia, át liu ita la haburas ekonómia, maibé haburas  fali tusan, tanba ne’e, ita presiza duni atu kuda situasaun tomak no presiza hadi’a kualidade moris povu maioria ni’an, atu hahú husi  ne’ebé, saída mak la’o naksalak to’o agora, laiha dúvidas, krize hahú husi sistema, krize iha ita-nia rai doben ida ne’e, ne’e ita bolu krize sistema, sistema atu hari’i, tenke iha definisaun polítika nasionál ne’ebé pro-povu, atu bele iha planu globál no sektoriál, nasionál no rejionál atu responde povu nia presiza”, Mari Alkatiri liu husi ninia diskursu iha konferénsia nasionál FRETILIN badala 4, iha salaun Igreja Katedrál Díli, Sábadu (14-03-2020).

SekJer FRETILIN ne’e subliña, maske gasta osan tokon ba tokon grupu balun mak benefísia, povu kontinua mukit no kiak.

Lee hotu :   Adere ba ASEAN, TL hein desizaun definitivu husi nasaun membru sira

“Realidade hatudu povu kontinua halerik ba nesesidade báziku, hanesan ba bee moos, laiha saniamentu no laiha ekonómia atu sustenta família”, tenik nia.

Atu responde ba informasaun ne’ebé  espalla iha públiku katak, partidu FRETILIN iha Parlamentu Nasionál (PN) vota kontra Fronteira Marítima (FM) ne’e Alkatiri afirma, bankada FRETILINla’ós vota kontra FM, maibé vota kontra pakote ekonómiku komersiál ne’ebé oferese porsentu 30 ba Austrália.

“FRETILIN hatene saída mak nia halo iha konferénsia, ita aprova rezolusaun ida rekoñese FM atu loke fali negosiasaun ba pakote ekonómiku komersiál oras to’o ona. VII Governu mak hahú hamutuk hodi koalia ba tasi Timor hodi kria komisaun ida atu halibur ideia hodi buka solusaun ba FM”, dehan SekJer FRETILIN ne’e.

Entertantu, iha loron 15, fulan Fevereiru, tinan 2018, Konsellu Ministru (KM) aprova testu akordu delimitasaun Timor-Leste ho Austrália hodi fó kompeténsia ba eis Ministru Adjuntu Primeiru Ministru (PM) delimitasaun FM, Hermenegildo Pereira, iha VII Governu lori Estadu nia naran asina akordu FM.

Iha loron 6, fulan Marsu, tinan 2018, Hermenegildo Pereira reprezenta  Estadu Timor-Leste ho eis Ministra Negósiu Estranjeriu Austrália, Julie Bishop reprezenta  Estadu Austrália asina tratadu FM, iha kuartel jerál Organização Nações Unidas (ONU) iha Nova Iorke. Ety/Ina 

Add to Comments Here!!!!

error: Content is protected.
Secured By miniOrange
You might also like:
PR Lú Olo: Ha’u sei estuda karta koligasaun foun no demisaun PM Taur

Prezidente Repúblika (PR), Francisco Guterres Lú...

Komisaun E PN fiskaliza irigasaun Dará Dau-Viqueqeu

Atu haree problema ne’ebé komunidade sira...

Espoza PR sertifika pesoal 12, konsidera erói sira iha mudansa ba violasaun feto iha TL

Espoza Prezidente Republika (PR), Cidalia Mouzinho...

Close