PN ladauk simu proposta lei alterasaun orsamentu no jestaun finanseira

Prezidente Parlamentu Nasionál (PN), Arão Noe, informa, dau-daun ne’e PN seidauk simu proposta lei ruma husi Governu kona-bá alterasaun datoluk ba lei orsamentu no jestaun finanseira.

“Aprezenta tiha lai mak ita haree konteúdu, tanba sistema normal governu hatama mai, haruka pareser ba tékniku sira husi diresaun apoiu plenária, depois baixa ba  komisaun relevante para haree konteúdu, sé karakter urjénsia PN aprova, tanba liga ba Estadu nia moris”, Xefe Órgaun Legislativu ne’e ba jornalista sira iha PN, Segunda semana ne’e.

Husi sorin seluk, Xefe bankada FRETILIN, Aniceto Guterres, hateten, FRETILIN apoiu proposta ne’ebé mai husi governu kona-bá alterasaun lei orsamentu no jestaun finanseira datoluk, artigu 31.

Tanba liu husi alterasaun lei refere, bele garante nafatin saldo tezoreiu, atu antesipa situasaun emerjénsia, ho nune’e atuasaun labele depende ba dezisaun polítiku.

“Ha’u hanoin proposta sira ne’e importante, FRETILIN hein proposta, ami apoia inisiativa proposta husi Governu, tanba atu fó fleksibilidade implementasaun orsamentu duodesimu”, tenik Aniceto.

Enkuantu Konsellu Ministru (KM) aprova proposta alterasasun ba lei númeru 13/2009 kona-bá orsamentu no jestaun finanseira ne’ebé   aprezenta husi Ministra Finansas (MF) Interina, Sara Lobo Brites, iha loron 11, fulan Marsu. ety