PR Lú Olo: Ha’u sei estuda karta koligasaun foun no demisaun PM Taur

Prezidente Repúblika (PR), Francisco Guterres Lú Olo, hatete, sei to’o tempu atu nia fó sai rezultadu kona-ba karta demisaun Primeiru  Ministru (PM), Taur Matan Ruak nian, inklui karta koligasaun foun, tanba agora Xefe Estadu sei tetu no estuda hela.

“Ida  ne’e ha’u  sei estuda halo  didiak tiha lai, buat sira ne’e hotu, dia 17 fali ne’e, interpretasaun ema la’os  jurista ninian,  ne’ebé ha’u  seidauk fó tempu rezultadu ne’e bainhira  mak fó sai, husik  ha’u  estuda didiak dokumentu ne’e. Kona-ba buat ne’e los ou la los ha’u sei bele koalia”,relata Lú Olo ba Jornalista sira bainhira partisipa kampaña nasional  “Sidadaun ida kuda ai oan ida”  Sesta (13/03/2020), iha Postu Administrativu Metinaro, Munisípiu Díli.

Enkuantu Primeiru Ministru, Taur Matan Ruak, manifesta nia karta demisaun ba Prezidente  Repúblika, iha fulan Fevereiru,  no Koligasaun Foun entrega ona karta rezultadu konferénsia partidu neen nian  ba  Prezidente Repúblika, iha loron 10 fulan Marsu tinan 2020.oly