Taka fronteira terrestre, Sahat Sitorus: Sei fó impaktu ba ekonomia Timor-Leste

Planu Governadór Nusa Tenggara Timur (NTT) atu taka liña Fronteira Terreste (FT), relasiona ho coronavirus (COVID-19), bele lori impaktu bo’ot ba aspeitu sosiál no mos ekonomia iha Timor-Leste.

Embaixadór Indonesia ba Timor-Leste, Sahat Sitorus, hateten lia hirak ne’e, Tersa (17/03), iha edifísiu Sekretária Estadu Protesaun Sivíl, Kaikoli-Díli, hafoin entrega ajudu umanitáriu husi kompañia Pertamina Internasional ba vítima inundasaun iha kapitál Díli.

“Ha’u rona duni informasaun ne’e husi jornál. Iha momentu ne’e, ha’u husu kedas klarifikasaun husi governadór NTT, kona-bá planu atu taka liña Fronteira Terreste”, informa Sitorus.

Nia dehan, atu taka fronteira entre nasaun, tenke hetan desizaun husi governu sentrál iha Jakarta. Maske nune’e, presiza mós envolve Governu Timor-Leste, tanba, tuir Sitorus, impaktu husi kestaun ne’e luan tebes.

“Ita (Indonézia ho Timor-Leste) la’ós de’it viziñu, maibé liu husi ida ne’e, relasaun ekonómia, sosiál, kultura no mós ema estranjeiru sira iha Timor-Leste nia impaktu boot tebes”, esplika Embaixadór Indonesia ba Timor-Leste ne’e.

Diplomata senior ne’e mós, hato’o ona ninia opiniaun ba Jakarta no mós ba governadór NTT, atu kuidadu bainhira deside taka FT, tanba bele kria ‘jalan tikus’ barak liu tán. Sitorus mós husu ba governu sentrál Indonézia, atu halo supervizaun ba desizaun husi governadór NTT ne’e.

“Ha’u fiar, planu ne’e labele akontese. Di’ak liu ita amenta vijilánsia iha Batugade, Mota Masin, Mota-Ain, Wini no Oé-Cusse do que ita taka fronteira mais ‘Jalan Tikus’ amenta. Ida ne’e perigozu. Buat importante seluk mak labele taka kampu aviasaun”, nia akresenta.

Kona-bá estudante Timor-Oan ne’ebé agora eskola hela iha Indonézia, tuir Embaixadór, kestaun ne’e konforme protokolu kada universidade, liu-liu ba estudante Timor-Oan sira-nia seguransa.

“Ha’u garante parte imigrasaun Indonézia, hanesan mós iha nasaun seluk, sei trata estudante Timor-Oan nia vistu. Ho ida ne’e, sira labele over stay”, sublina Sitorus. lex/del

Leave a Reply

Your email address will not be published. Required fields are marked *