AJAR: Dekretu Governu ba EE iha lakunas barak

Diretór Ezekutivu Asia Justice and Rigths (AJAR), José Luis Oliveira, deklara, AJAR konsidera dekretu governu da-ualu ba implementasaun Estadu Emerjénsia (EE) iha lakuna barak liu-liu seidauk implementa ka regula didiak regra ba  sirkulasaun transporte sira durante Estadu Emerjénsia, tanba halo diskriminasaun ba transporte públiku sira.

“Ida ne’e lakuna ida ne’ebé mosu iha dekretu governu ne’e, tanba ladun regula didiak kona-ba kestaun transporte iha rai-laran no mos halo diskriminasaun ida. por ezemplu iha ne’e tuir dekretu regula deit katak transporte koletivu sira bandu, agora oinsa ho ema sira ne’ebé mak la iha kareta, maibe nia presiza ba óspital, nia presiza ba sosa aimoruk nia presiza ba sosa hahán ne’e oinsa?, kestiona Diretor AJAR ne’e ba Jornalista sira (03/04/2020) iha Resintu Muzeu Rezisténsia Díli.

Nia afirma,  kaundu bandu tranporte públiku sira ne’e, maibe husik hela ema privadu sira ho kareta privadu la’o, entaun ne’e hatudu diskriminasaun, ema kiak bele mate la’os  tanba virus ne’e, maibe mate tanba  hamlaha, ida ne’e lakuna mosu iha ne’e.

“Ami akompaña iha momentu konselhu ministru elabora lei ne’e, versaun ida primeiru diak oituan,  versaun primeiru ne’e regula transporte públiku sei bele lao naran katak nia tenki ijiene, tenke rega desifektan,  tenke mantein distansia la bele besik malu, tenke um metru, nune’e  mos taksi bele la’o,  taksi bele tula ema ida, ne’e versaun ida primeriu, maibe infelizmente ida ne’e, sira halo lakon tiha, sira tau deit jeral transporte koletivu la bele la’o”,fundamenta José.

José akresenta tan, “informasaun husi governu mak karik populasaun balun moras telefone ba ambulánsia,  maibe karik ema ida hakarak ba Apotik, karik ba sosa hahan ruma, agora nia atu telefone ba se? ida ne’e mak iha lakuna ida iha lei ne’e.” Oly