DOT fulan Abril ba PN hetan kortes porsentu 17

Sekretária Jerál (SekJer) Parlamentu Nasionál (PN), Cedelizia Faria dos Santos, informa, Dotasaun Orsamentu Temporáriu (DOT) ba PN fulan Abril nini’an hetan kortes porsentu 17 ho osan rihun USD213, tanba durante implementasaun Estadu Emerjénsia (EE) laiha viajen estranjeiru no formasaun.

“DOT fulan Janeiru no fulan Marsu ba PN hamutuk millaun USD1.2, maibé ba fulan Abril ita hetan millaun USD1. Razaun  kortes, relasiona implementasaun EE ne’ebé dekreta laiha viajen estranjeiru no formasaun, tanba ne’e, Ministériu Finansas (MF) fó PN nia osan mai la inklui ona orsamentu viajen estranjeiru no formasaun”, SekJer PN ne’e ba jornalista sira foin la-lais ne’e iha PN.

Cedelizia akresenta, maske DOT fulan Abril hetan kortes, maibé la fó impaktu ba aktividade PN, tanba DOT mezmu hetan kortes, PN rasik iha ona rihun USD50 husi Corona Virus Disease 2019 (COVID-19).

“Ita boot sira hatene Governu foin mak aprova dekretu lei, ita foin prosesu oinsa atu foti osan, ita hotu hatene ministériu tolu (3) mak responsabiliza ba ida ne’e, hanesan MF, MS no MNEK“, subliña SekJer PN ne’e.

Entertantu, orsamentu duodesimu PN ba fulan Abril, kompostu husi selu  saláriu ba funsionáriu, manutensaun no viajen lokál ba deputadu sira. ety