Hakotu impase polítiku, ACBN : PR tenke konsisten iha desizaun

Atu hakotu impase polítiku ne’ebé dau-daun ne’e Timor-Leste enfrenta, Associação dos Combatentes da Brigada Negra (ACBN) husu ba Prezidente Repúblika (PR), Francisco Guterres “Lú Olo” atu konsistente iha foti desizaun no konsisten mós atu implementa rekomendasaun ne’ebé fó sai husi rezultadu enkontru meja redonda entre líder polítiku ho líder nasionál sira antes ne’e.

“Ami husu ba ita-nia na’i PR tenke hakru’uk ba ita-nia lei inan, la’o tuir lei inan konsistente, oras ida haksoit ba ida ne’e, ne’e hatudu inkonsisténsia ita haree no hatudu katak, ami nota uitoan oras ida forma Governu husu partidu polítiku buka malu, oras ida iha plenu poder Primeiru Ministru (PM), Taur Matan Ruak hatama karta demisaun la simu, oras ida fali mosu fali situasaun seluk”, Sekretáriu  Jerál ACBN, Rui Lourenço da Costa, liu husi konferensia imprensa, iha Sábadu semana kotuk.

Maibé, Prezidente ACBN, Nuno Corvelo Sarmento “Laloran”, hateten, Xefe Estadu nia kompeténsia konsagra ona iha konstituisaun RDTL, hodi bele hakotu impase polítiku.

“Iha loron 10, fulan Fevereiru, tinan ne’e, tuir  kompeténsia PR ne’ebé hatuur ona iha konstituisaun RDTL artigu 74, 85 no 86, bazeia artigu refere halo  ita-nia kna’ar hodi fó komprimentu ba artigu 106 konstituisaun RDTL, nu’udár imperativu atu hakotu impase polítiku ka ami bolu Estadu Emerjénsia. Estadu Emerjénsia ne’e mak karik la hakotu, sei permite Estadu lakon atu rezolve problema hanesan pandémia COVID-19“, tenik Nuno.

Entretantu ACBN mós rekomenda ba Xefe Estadu, Parlamentu Nasionál (PN), Xefe Governu no instituisaun judisiál sira atu rezolve impase polítiku ne’e, labele dada naruk tan ona, maibé tenke foti medida imediata. Akademiku, jurista no sosiedade sivíl sira tenke nakloke ho apoiu konseptualizasan no halo anliza ba makro -polítika iha mundu no nasaun bazeia ba lei inan no lei oan ne’ebé vigora hela.

Antes ne’e, jurista Timor-Oan, Manuel Tilman, hateten, PM iha dalan atu retira fali ninia karta demisaun, relasiona ho situasaun atuál iha Timor-Leste ne’ebé ezije Xefe Governu atu asume nafatin kargu , tanba impase polítiku sei la hotu bainhira governasaun laiha mudansa ruma.

Nune’e mós akademista balun sujere, iha situasaun EE ne’e, di’ak liu polítiku na’in sira tau sees tiha lai asuntu polítiku no fó liman ba malu hamutuk, hodi rezolve pandémia COVID-19 ne’ebé povu no nasaun enfrenta hela. ety

 

Leave a Reply

Your email address will not be published. Required fields are marked *