JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

KHUNTO la ses-an husi AMP, CNRT sei keisa deputada Olinda ■Olinda husu deskulpa tanba naran koalia de’it

KHUNTO la ses-an husi AMP, CNRT sei keisa deputada Olinda ■Olinda husu deskulpa tanba naran koalia de’it

Sekretáriu Jeral Partidu CNRT em Exercício, Jacinto Rigoberto, informa, durante ne’e konselleiru máximu Partidu Kmanek Haburas Unidade Nasional Timor Oan (KHUNTO), José dos Santos Naimori Bucar, sempre halo kontakta lideransa partidu CNRT nian hodi firme katak KHUNTO nunka ses-an husi koligasaun foun partidu neen ne’ebé lideradu husi líder rezisténsia, Kay Rala Xanana Gusmão, ho naran Aliansa Maioria Parlamentar (AMP).

“Ami sempre iha kontaktu ba malu. La ses-an, tanba ami iha AMP nia laran. Depois de hetan akuzasaun, sr. Naimori iha komuniasaun dehan, nia lamenta teb-tebes ho pronunsiamentu ne’ebé maka akontese iha Parlamentu Nasional (bankada FRETILIN ho deputada Olinda foti iha plenária Segunda semana ne’e)”,dehan Jacinto Rigoberto.

Akuzasaun ne’ebé deputada bankada KHUNTO, Olinda Guterres, halo hasoru Sekretáriu Jeral partidu CNRT em exercício Jacinto Rigoberto, ne’e mak hanesan, lori kilat halo ameasa ba konselleiru superior partidu KHUNTO José dos Santo Naimori Bucar iha ninia rezidensia iha loron Kinta (23/4/2020).

Sekretáriu Jerál partidu CNRT em exercício, Jacinto Rigoberto, lamenta ho akuzasaun falsu refere, ne’ebé hafo’er naran di’ak partidu no pesoal ne’e rasik.

“Ha’u rejeita no lamenta tebes ho akuzasaun falsu husi Membru Parlamentu Nasional, balun (Deputada Olinda ) ne’ebé iha enkontru lideres bankada iha uma fukun PN akuza ha’u ata, Jacinto Rigoberto, tau ninja hamutuk ho ema na’in haat ho kilat uza kareta pik up laiha xapa iha oras 11.40 ba ameasa Bou Naimori nu’udar konselleiru másimu iha nia rezidénsia. Ho akuzasaun falsu ida ne’e halo públiku no media sosial sira ne’ebé ho intensaun polítika diferente aproveita hodi divulga no halo atake ba ha’u ho ha’u nia partidu CNRT. Dala ida tan akuzasaun ne’e falsu no lamentavel tebes nu’udar reprezentante povu iha uma fukun nasional ne’ebé atu defende lia loos no povu nia direitu. Ho akuzasaun falsu ida ne’e implika tebes ba ha’u nia siguransa vida, no ha’u nia familia nia situasaun, halo hau nia familia tomak pániku no iha trauma nia laran. Mezmu distinta Deputada Olinda iha Sábadu dader telefone ha’u, hodi husu deskulpa, katak nia koalia iha enkontru lideres bankada ne’e naran ko’alia de’it, tan rona husi ema no nia iha hela kondisaun saúde ne’ebé ladun diak.”haktuir Rigoberto.

Lee hotu :   KM diskuti proposta funsionáriu Sentrál Eletrika Hera no Betano

Jacinto afirma tan, iha Kinta-feira semana kotuk nia parte ba duni rezidensia Naimori nian, maibe iha ambiente ne’ebé baibain hanesan aliadu AMP nian, la’os atu halo ameasa.

“Ha’u sidadaun babain ida laiha direitu no kbiit atu uza kilat. Tuir Lei ema ne’ebé iha direitu atu kaer kilat so F-FDTL no PNTL deit. Ha’u ho ha’u nia partidu laiha kilat, ne’e duni Governu liu husi Ministeriu Defesa no Seguransa tenki buka hatene se maka halo asaun ida ne. Ne’eduni keta iha duni ema ruma ho armas ba duni karik Bou Naimori nia rezidensia, Ne’e so polisia ho FFDTL mak bele hatene, ha’u laiha koñesimentu no involvimentu, sobre asaun refere. Iha Kinta dader por volta tuku 9 resin ha’u ba duni Bou Naimori nia rezidensia ho ha’u nia kareta Pajero ida ho xapa matríkula kompletu. Ha’u ba Bou Naimori hodi halo komunikasaun no kordenasaun tan KHUNTO nu’udar Partidu ida ne’ebé formalmente hamutuk hela ho partidu 5 seluk iha AMP nia laran. Ha’u laos ba halok omunikasaun hodi sobu fali partidu seluk nia aliadu. Durante hau nia enkontru ho Bou Naimori, ami ko’alia iha ambiente ida ne’ebé amigavel, iha ámbitu AMP nia laran hanesan babain ho komitmentu ne’ebé nafatin. Laiha lojika liu ha’u ho hau nia partidu CNRT ba ameasa fali KHUNTO ne’ebé hamutuk, hela iha AMP nia laran. Ne’e duni ema ne’ebé lansa isu sira ne’e, sira maka hakarak sobu Aliansa Maioria Parlamentar (AMP) ne’ebé kompostu husi partidu neen”,dehan nia.

Tuir Jacinto Rigoberto, ema sira ne’ebé lansa isu bosok ne’e nu’udar tentativa atu sobu AMP atu bele asegura sira nia interese polítiku.

Lee hotu :   KESTIONA LEGALIDADE FOTI OSAN FP, PUDD HUSU PJR FISKALIZA ABSTRATA

“Ita hakarak halo polítika tenki ho dignu no gentel, maibe labele uza fali ema seluk kahalo fali ema seluk sai vítima kambing hitam ba politika foer ne’ebé iha. Ita la’os hanesan iha tempu okupasaun ne’ebé iha presaun no intimidasaun nia laran, ita agora iha tempu demokrasia no liberdade nia laran. Depende konfiansa no kbi’it aprosimasaun polítika ida-idak nian. Hanesan ha’u dehan ona iha leten, ba Bou Naimori nia uma nu’udar ami nia aliado. La iha logika hau ba intimida fali hau niaaliado. Ne’eduni dala ida tan hau ho hau nia partidu CNRT rezeita total akuzasaun falsu ne’e ,no husu atu autoridade kompetente tenki halo investigasaun ne’ebé klean no transparente no lais sobre asuntu ida ne’e. Husu mos atu investiga ema sira ne’ebé iha FB ne’ebé divulga no halo akuzasaun falsu sira ne’e. Ha’u rasik mos sei hato’o keixa ba atoridade kompetente nu’udar ha’u nia direitu atu defende ha’u nia an. Nu’udar sidadaun ne’ebé mos hola parte iha prosesu naruk ba ukun an hau husu atu entidade kompetente, hanesan PNTL, no mós Ministru Interior atu imediatamente klarifika no  investiga klean sidadaun ne’ebé de’it maka sei uza kilat iha sosiedade nia laran. No rejultadu investgasaun tenki fo’o sai ba públiku liu husi televizaun no jornais. Urgente atu labele iha ema maka, tamba rajaun balun, sei rai ka kaer kilat iha uma no lori kilat ba intimida ema seluk i akuza fali ema seluk. Hau hateten ida ne’e atu salvaguarda katak iha futuru sei la iha sidadaun seluk sai vitima akuzasaun falsu hanesan agora Deputada Olinda halo ba hau.”afirma sekjer CNRT interinu ne’e.

Lee hotu :   Prevene konfrontu, PN husu Governu rejista GAM

CNRT sei keisa deputada Olinda tanba halo akuzasaun falsu

Vise xefe bankada CNRT, deputadu Patrocino Fernandes, deklara, partidu CNRT sei halo keisa deputada KHUNTO, Olinda Guterres, ne’ebé halo akuzasaun falsu no bosok hasoru sekretáriu jerál partidu CNRT em exercício  Jacinto Rigoberto katak halo ameasa hasoru konselleiru Partidu KHUNTO José dos Santos Naimori.

“Akuzasaun bosok no falsu hasoru kompañeiru Jacinto Rigoberto no partidu CNRT, hautdu momoos ba povu tomak katak, iha ona grupu organizadu ho nia imunidade subar iha Parlamentu Nasionál ho sistemátiku halo bebeik polítika fo’er hasoru ninia oponente polítiku sira. Akuzasaun ne’e halo hosi deputada Olinda Guterres bankada KHUNTO iha reuniaun lídere bankada iha loron 24 fulan Abril ne’e, iha PN, ne’e falsu, tanba José dos Santos Niamori rasik ninia seguransa desmente informasaun ne’e. Bankada CNRT husu ba Ministériu Públiku no PNTL atu halo lalais investsigasaun profunda sobre missaun okulta, objetivu sasubar iha kazu ida ida ne’e, atu buka hatene involve se de’it no objetivu sira nian saida loos. Ami husu ba deputada Olinda Guterres, bankada KHUNTO atu esplika  no klarifika ba iha públiku sobre informasaun falsu ne’e. Kompañeiru Jacinto Rigoberto ho partidu CNRT sei lori prosesu ne’e ba oin hodi husu responsabilidade ba ema hirak ne’ebé mak halo akuzasaun falsu hodi hasoru kompañeiru Rigoberto no partidu CNRT hodi hetan hikas naran di’ak no lia loos.”hateten Patrocino liu hosi konferénsia imprensa iha PN, Tersa (28/04/2020).

Entretantu, GMN tenta konfirma ho deputada Olinda Guterres, maibe deputada ne’e laiha nia fatin.Say

Add to Comments Here!!!!

error: Content is protected.
Secured By miniOrange
You might also like:
TL agradese Xina tanba apoia tan ekipamentu médiku ba prevensaun COVID-19

Embaixador Xina ba Timor-Leste entrega ekipamentu...

Janeiru-Abril: Dengue 1050, ema na’in ualu mate

Diretóra Jeral Prestasaun Saúde Ministériu Saúde,...

Luis Roberto: Laiha orientasaun husi líder AMP vota kontra ka a favór ba estensaun EE

Deputadu bankada KHUNTO, Luis Roberto da...

Close