KHUNTO rezeita informasaun hola parte iha koligasaun FRETILIN no PLP

Deputadu bankada Kmanek Haburas Unidade Nasionál Timor-Oan (KHUNTO), Luis Roberto, rezeita informasaun ne’ebé partilla iha Média Sosiál (MedSos) katak, KHUNTO sei hola parte iha koligasaun foun husi partidu Frente Revoluciónaria do Timor-Leste Independente (FRETILIN) no Partido Libertaçao Popular (PLP), tanba to’o agora nia parte ladauk simu informasaun kona-bá asuntu ne’e.

“Ha’u hakarak hateten ba públiku relasiona informasaun ne’ebé espalla iha MedSos kona-bá KHUNTO ne’ebé dehan sai husi koligasaun foun ne’ebé lídera husi Xanana Gusmão katak, ami dada-an husi ne’ebá ne’e informasaun laloos, tanba-sá mak ha’u dehan infromasaun ne’e laloos,  tanba ami nu’udár membru konsellu superiór partidu KHUNTO no mós reprezentante povu iha Parlamentu Nasionál (PN) ne’e, ami seidauk hatene kona-bá infromasaun ida ne’e”, atuál Vise PN ne’e ba jornalista sira iha PN, Tersa (14-04-2020).

Nia salienta, karik informasaun ne’e iha nu’udár membru superiór KHUNTO no deputadu KHUNTO na’in lima (5) iha PN tenke hatene.

Ho nune’e, husu ba públiku atu labele fiar informasaun ne’e, agora ne’e parte hotu sei fokus ba coronavirus (COVID-19).

“Kona-bá koligasaun foun ita hotu hatene katak, iha momentu ne’ebá iha ona asinatura ida, partidu hirak ne’ebé partisipa iha asinatura, iha Bairro dos Grilhos ne’ebé lidera husi Xanana Gusmão, ami fó tiha ona ba Prezidente Repúblika (PR), ne’ebé hein de’it desizaun husi PR, tanba ne’e ikus-ikus ne’e informasaun ne’ebé espalla iha MedSos ne’e falsu ida”, subliña Luis.

Deputadu V lejislatura ne’e akresenta, dau-daun ne’e membru KHUNTO ne’ebé nafatin iha VIII Governu servisu nafatin hanesan bai-bain, seidauk iha informasaun ida katak, atu rejigna-an husi servisu ne’e no sira mantein nafatin servisu, hodi responde ba situasaun ida agora.

“Husu ba públiku para labele fiar ba infromasaun sira ne’ebé sai la tuir nia regras, ita hotu agora ne’e fokus ba COVID-19, tanba ne’e, polítika ita hotu hatene katak, tau tiha polítika ba kotuk lai, ita fokus uluk mak ida moras ne’e”, hakotu deputadu KHUNTO ne’e.

Entretantu partidu refere mós sei kontinua apoiu VIII Governu Konstitusionál, ne’ebé lidera husi ne’ebé lidera husi Primeiru Ministru (PM), Taur Matan Ruak, hodi kombate propagasaun COVID-19 iha Timor-Leste. oly

Leave a Reply

Your email address will not be published. Required fields are marked *