PM kongratula komportamentu sidadaun durante tendensia polítika iha PN

Primeiru Ministru (PM), Taur Matan Ruak, kongratula  membru Parlamentu Nasional, tanba ultrapasa ona problema polítika, no kongratula povu sira tanba hatudu maturidade no komportamentu ne’ebé di’ak, durante tendensia polítika  ne’ebé akontese iha Parlamentu Nasional.

“Hanesan governu kongratula esforsu Parlamentu nian, ultrapasa diverjensia no problema sira ne’ebé eziste, infelizmente iha problema oituan ne’e hanesan baibain ita dehan be kona fakar ona, ita lalika tanis tuir be fakar ne’e,  ita haree fila-fali, halonusa mak aban ba oin”, hatete PM Taur ba Jornalista sira Kinta (21/05/2020), iha Palásiu Prezidensial Nicolau Lobato, Bairo Píte Díli.

Taur apela hanesan orgaun soberania ida lidera ezekutivu, para que Parlamentu reestabelese fila fali, tanba  nia hakarak lori fila fali orsamentu ba Parlamentu Nasional.

“Porque ita la bele, ita-nia nasaun funsiona ona baze de duodesimu, ita presiza reativa fila-fali ita-nia ekónomia para populasaun sira-nia moris bele la’o normal fila-fali, ida ne’e mak ha’u nia preokupasaun.” subliña Taur.

Xefe Governu hakarak aproveita oportunidade kongratula populasaun  tomak nia komportamentu  iha relasaun situasaun sira hanesan ne’e.

“Ha’u hakarak hatete ha’u urgullu los, hola parte ezekutivu ida ne’e,  lídera País  ida, iha sidaduan “muito esclarecido muito sivismo” ha’u urgullu los no  parabens ba povu Timor, kontinua nafatin hanesan ne’e ho sira nia kontribuisaun, ida-idak halo nia servisu, hanoin katak buat ne’ebé aat nunka halibur ita, buat ida ne’ebé diak sempre halibur ita, hametin ita-nia Nasaun no unidade, ne’e importante tebes”, tenik tan Taur.Oly