PR seida’uk promulga dekretu lei subsídiu ba estudante não bolseiru

Dekretu lei kona-ba, subisídiu ne’ebé atu fó ba estudante não bolseirus iha estranjeiru, dadaun ne’e iha ona meza Prezidenti Repúblika (PR), Francisco Guterres Lú Olo, bainhira promulga ona, hafoin halo pagamentu.

Ministru Negosiu Estranjeiru no Kooperasaun, Dionísio Babo hateten, bainhira promulga ona, Governu halo ona pagamentu, dokumentus hotu preparadu ona no kabementu orsamentu no programa ne’e rasik konsellu jestaun haree hotu ona.

“Maibé iha implementasaun, ita tenki kuidadu tamba ita fó deit ba Timor-oan sira ne’ebé, não bolseirus hela iha rai liur, ho sira ne’ebé mak tamba COVID-19, labele fila mai TL iha rejista, no sira ne’ebé maske não bolseirus maibé fila ona mai TL, bainhira hatama naran hodi simu subsídiu, Governu sei haree fila fali” dehan, Ministru Negosiu Estranjeiru no Kooperasaun Dionísio Babo, iha Edifisiu MNEK, Kinta (14/05/2020).

Governante ne’e subliña liutan, dekretu lei ne’ebé, Konsellu Ministru aprova, hateten momos ona katak, sei fó subsídiu ba Timor-oan ne’ebé não bolseiru iha estranjeiru no orsamentu ne’ebé atu fó apoiu ba estudante hirak ne’e, tuir kustu da vida husi, kada nasaun  no Timor-oan rihun rua mak sei benefisia ba subsídiu ne’e.

“Ba sira ne’ebé mak mai ona Timor-Leste favor ida, lei la fó dalan atu hetan subsídiu, tamba ne’e bainhira ita atu implementa tenki kuidadu, tamba iha konsikuensia legais, tamba ne’e husu atu Timor-oan hotu atu komprende,”afirma, Dionísio Babo.Cin