Vise PPN: Diriji meja tenke hetan autorizasaun husi PPN

Segundu Vise Prezidente Parlamentu Nasionál (PN), Luis Roberto, informa, antes Vise Prezidente PN na’in rua (2) diriji plenária, tenke hetan autorizasaun husi Prezidente Parlamentu Nasionál (PPN).
“Vise PPN na’in 2 atu diriji meza hodi halo plenária, tenke hetan autorizasaun husi PPN bazeia ba rejimentu PN artigu 17 kompeténsia PPN delega kompeténsia ba Vise na’in 2 no bazeia ba rejimentu PN artigu 22. Vise iha kompeténsia bainhira hetan delegasaun ofisialmente husi PPN bainhira laiha autorizasaun fila-fali ba maioria deputadu iha PN. Ha’u nu’udár Vise PPN hakarak hateten, buat hotu bazeia ba legalidade ne’ebé mak iha no kumpre legalidade ne’ebé vigor hodi sai matadalan ba iha PN, maske semana rua ona laiha aktividade, PPN mós laiha informasaun ruma ba Vise na’in 2 hala’o aktividade hanesan bai-bain, ami Vise prontu ezekuta de’it orden bazeia ba legalidade ne’ebé iha”, Segundu Vise PPN ne’e ba jornalista sira iha PN, Kinta (14-05-2020).
Tuir PPN, Arão Noe, wainhira Vise na’in 2 lidera meza la hetan autorizasaun husi PPN, ne’e viola ona rejimentu artigu 17 no la tuir regra administrativa PN.
Nia parte rejeita mós deklarasaun rekerente sira ne’ebé halo akuzasaun ba nia katak, la hala’o funsaun hanesan PPN no impede aktividade plenária.
“Ha’u, PPN kompremitidu atu kumpre konstituisaun RDTL, artigu rua (2) katak, Estadu hakru’uk ba lei inan no lei oan sira, tanba ne’e, ha’u husu ba órgaun Estadu atu ita hotu hakru’uk de’it ba lei inan ka konstituisaun”, afirma Xefe Órgaun Lejislativu ne’e.
Antes ne’e, Vise Xefe bankada PLP, Francisco de Vasconcelhos, deklara semana oin, Vise na’in 2 obrigatoriamente diriji meza PN, hodi halo plenária. ety
Add to Comments Here!!!!