COVID-19 nafatin sai ameasa, Governu seida’uk reativa movimentu aéro

Ministru Transporte Komunikasaun (MTK), Jose Agustinho da Silva hateten, movimentu aviaun ka transporte Aero nian seida’uk bele halo operasaun normal, tanba COVID-19 sai nafatin ameasa globál.

Governante ne’e afirma, Governu seida’uk deside atu autoriza, movimentasaun Aero, Terestre no Marítima, tanba coronavírus sai nafatin ameasa global iha mundu, hodi ameasa ema nia vida, inklui mós Timor-Leste.

Tanba ne’e, Governu sei tetu ho di’ak hafoin loke fila fali, pontu entrada sira ne’e.

“Ita haree dinámika moras pandemia COVID-19, ita tetu didiak depois atu ba faze normalizasaun oinsa depende ba situasaun rai laran idak-idak ni’an, ita haree moras ida ne’e ameasadu populasaun jeral iha mundu tomak, inklui Timor-Leste ita nia nasaun viziñu sira mós dinámika husi moras ida ne’e la’o hela ho persentajen ne’e sa’e ita tetu”,dehan, Ministru Transporte Komunikasaun, José Agustinho da Silva, ba GMN iha nia knar fatin, Caicoli, Sesta (05/06/2020).

Ministru ne’e informa liutan, maske Timor-Leste rekoperadu ona husi surtu COVID-19, maibé atu loke fali, odamatan nasaun ni’an, hanesan portu, aeroportu no fronteira Governu sei tetu nia risku, hafoin bele reativa hikas.

Nune’e, José Agustinho haktuir tan, Governu seida’uk iha previzaun atu normaliza movimentasaun, tanba surtu COVID-19, la’os transmisaun lokál, maibé moras refere importadu, liu husi pontu entrada.Ina