FRETILIN husu AIFAESA halo inspesaun ba sasán sira iha loja

Reprezentante povu iha uma fukun Parlamentu Nasionál (PN), liu-liu bankada FRETILIN husu ba Autoridade Inspesaun no Fiskalizasaun ba Aktividade Ekonómiku no Sanitária (AIFAESA, IP), atu halo inspesaun ba sasán nesesidade báziku iha loja sira, hodi prazu husi sasan ne’ebé fa’an iha loja.

“Ita-nia komunidade iha suku sira simu dau-daun ona subsídiu USD100, maibé presiza mós haree katak sira-nia nesesidade kompra sei boot tun ba loja sira. Ha’u husu ba Governu, liu husi AIFAESA atu halo ona inspesaun ba sasan sira ne’ebé liu prazu hanesan supermi, sardina lata no ai-han sira ne’ebé nesesidade ba povu nia konsumu loro-loron ni’an”, deputadu bankada FRETILIN, Favião de Oliveira liu husi plenária iha PN, Tersa (09-06-2020).

Nia akresenta, presiza AIFAESA halo fiskalizasaun ba sasan nesesidade báziku sira iha loja, atu nune’e osan ne’ebé povu simu ne’e hodi sosa sasan hirak ne’ebé saudavel.

“Tauk loja sira tau sasan liu prazu iha armajen sira hasa’i fali ho osan ne’ebé sirkula iha povu, povu sira bele ba sosa sasan, liu-liu iha munisípiu sira bele afeta ba povu sira nia saúde, tanba ne’e, importante Governu liu husi AIFAESA atu haree no halo ona peskiza ba loja sira ne’ebé iha munisípiu sira, tanba komunidade sira iha suku ne’e la hatene, Governu tenke toma konsiderasaun urjentimente”, tenik Favião.

Relasiona ho preokupasaun ne’e, reprezentante Governu, Sekretáriu Estadu Komunikasaun Sosiál (SEKOMS), Mericio Akara, rejista no sei hato’o ba instituisaun relevante sira atu haree. ety