Governu deside la prolonga EE

Governu liu husi Konsellu Ministru (KM), halo alterasaun dahuluk ba, Dekretu Lei númeru 16/2020 loron 30 fulan Abril, kona-ba medida hodi fó apoiu ba empregu iha ámbitu pandemia COVID-19, alende ne’e Governu lá estende tan Estadu Emerjensia (EE).

Ministru Prezidensia Konsellu Ministru, Fidelis Leite Magalhães, hateten, alterasaun Dekretu Lei ida ne’e nia periodu kobertura remata iha fulan Juñu, tamba ne’e Governu sei la prolonga tan Estadu Emerjensia (EE).

“KM halo alterasaun dahuluk ba dekretu lei númeru 16/2020, kona-ba atribuisaun 60% ba subisídiu ba empreza ne’ebé ho objetivu atu apoiu traballador sira, no alterasaun ida ne’e nia periodu kobertura, hotu iha juñu komprimisu ne’ebé mak antes ne’e iha ona nia sei respeita, maibé laiha estensaun hafoin fulan Juñu”, dehan Ministru Prezidensia Konsellu Ministru, Fidelis Leite Magalhães, iha Palasiu Governu, Kuarta (24/06/2020).

Governante ne’e esplika, agora halo avalizasaun katak, situasaun aktividade ekonomia rekoperadu ona, kompara katak antes ne’e iha aktividade ekonomia balun paradu, maibé agora sei iha ona faze normalidade, ida ne’e antisipa hela faktu ida, sei laiha estensaun EE.

Fidelis subliña liutan, ho ida ne’e aktividade hotu sei la’o fali ho normal, naturalmente Governu tenki tau nafatin medidas ne’ebé importante, atu asegura katak la importa virus husi rai liur no evita kria fali moras seluk, ne’ebé tama daet ho lalais.

“Governu preokupa liu mak  posibilidade importasaun, ho ida ne’e kompetensia Governu nian, atu implementa regras kona-ba izolamentu obrigatoriu no kuarentena obrigatoriu, Governu iha poder halo ida ne’e bainhira, iha ema tama husi  liña fronteira,” afirma, Fidelis. Cin