Indefere pedidu husi eis PPN Arão Noe, CNRT konsidera TR halo desizaun polítika

Xefe bankada CNRT, Duarte Nunes, hateten, Tribunál Rekursu (TR) indefere pedidu fiskalizasaun abstrata konstitusionalidade kona-bá destituisaun eis Prezidente Parlamentu Nasionál (PN), Arão Noe, ho razaun, tanba desizaun polítika ne’ebé laiha kontrolu husi TR.

“Indefere tuir tribunál ne’e, tanba nia la haree ba asuntu, maibé haree de’it ba prosedimentu de desizaun polítika no laiha kontrolu husi tribunál, ida ne’e mak nia deklarasaun, ita iha Timor ne’e hanesan ne’e, ita laiha justisa ona kona-bá ohin atu tuir plenária, ohin ami sei tuur hamutuk, ami sei deside loos, tanba ne’e CNRT prontu simu desizaun husi TR, tanba lakohi ko’alia asuntu polítiku, só ko’alia krime de’it ne’ebé ita haree”, Reprezentante povu ne’e ba jornalista sira iha PN, Segunda (01-06-2020).

Duarte esplika, hafoin tribunál anúnsia desizaun ba pedidu fiskalizasaun, bankada CNRT ho aliadu sira iha Segunda, loron 6, fulan ne’e, partisipa ona iha plenária ne’ebé diriji husi Prezidente PN, Aniceto Guterres.

Entretantu, CNRT husu pedidu fiskalizasaun abstrata konstitusionalidade  kona-bá destituisaun eis Prezidente PN, Arão Noe, iha loron 18 no loron 19, fulan Maiu, mosu dezintendimentu entre deputadu sira iha PN, hodi estraga meza Prezidente PN.

Nune’e mós iha loron 28, fulan Maiu, tinan ne’e,TR indefere pedidu fiskalizasaun abstrata konstitusionalidade kona-bá destituisaun eis Prezidente PN ne’e. ety