Pedidu Governu ba LFP millaun USD 286 aprovadu iha PN

Parlamentu Nasionál (PN), aprova ona segundu pedidu Levantamentu Fundu Petrolíferu (LFP) hodi autoriza Governu foti osan millaun USD 286.08. Segundu pedidu levantamentu estraordináriu fundu petrolíferu ne’e, pasa iha finál global ho votu a favór 43, abstensaun 18 no kontra 0.

Husi montante millaun USD 286.08, ne’ebé Parlamentu Nasionál fó autorizasaun ba Governu atu halo levantamentu ne’e, millaun USD 216 liu ba reforsa kofre Estadu hodi finansia mákina Estadu, inklui millaun USD 70 ba rekuperasaun ekonómika, ho prevensaun ka antesipa ba pandemia COVID-19, tanba Timor-Leste sei iha ameasa boot, bainhira kazu COVID-19 iha nasaun viziñu Indonézia seidauk lakon.

Durante diskusaun, maioria deputadu kinta lejislatura mak ezije Governu da-ualu atu aprezenta relatóriu ezekusaun levantamentu estraordináriu dahuluk, osan hosi fundu petrolíferu ho montante millaun USD 250 ne’ebé kompostu hosi fundu COVID-19 ho rekuperasaun ekonómika hamutuk millaun USD 150 no tokon atus-ida (100) reforsa kofre Estadu.

Hafoin votasaun, Prezidente Parlamentu Nasionál, Aniceto Guterres Lopes, aviza ba deputadu sira komisaun C, atu bele prepara relatóriu ikus, halo redasaun final, nune’e hato’o ona ba Xefe Estadu, atu bele foti desizaun tuir kompeténsia ba pedidu levantamentu fundu petrolíferu daruak ne’e. Say