PM Taur husu parseiru sira fó prioridade ba dezenvolvimentu TL

Primeiru Ministru (PM), Taur Matan Ruak, fó orientasaun polítika ba membru Governu inklui parseiru sira iha Timor-Leste (TL), atu konsentra di’ak liu ba prioridade dezenvolvimentu durante mandatu VIII Governu.

“Objetivu husi enkontru ida ne’e, atu rona orientasaun polítika kona-ba prioridades, dezenvolvimentu Timor-Leste nian husi Primeiru Ministru loke dalan ba oin, atu nune’e iha mandatu oitavu Governu ida ne’e bele halo konsertasaun diak liu ba iha, prioridade dezenvolvimentu ida nian, iha ne’ebé ita mos bele kapitaliza, apoiu husi parseiru dezenvolvimentu sira”,dehan, Ministru Prezidensia Konsellu Ministru, Fidelis Leite Magalhães, iha Palásiu Governu, Tersa (02/06/2020).

Governante ne’e hatutan, Prezidensia Konsellu Ministru parte sei ajuda atu tradus vizaun bo’ot husi PM, ba iha liña ministeriu sira, bainhira presiza apoiu tekniku no rekursu.

“Husi parseiru dezenvolvimentu sira, ita bele konserta kooperasaun hirak ne’e, atu bele ajuda tradus orientasaun polítika ba asaun sira, hafoin rona orientasaun husi PM, Governu kontinua enkontru ho parseiru dezenvolvimentu sira, atu nune’e haree ba oin bele tradus prioridade hira ne’ebé Primeiru Ministru hatur ne’e, ba iha asaun implementasaun ba ministeriu hotu,” esplika, Fidelis.

Fidelis subliña liutan, iha pontus balun ne’ebé iha, ba dala uluk komunidade internasional iha ne’e, atu iha lian ida no hanoin ida, hodi apoiu Governu hodi hetan objetivu dezenvolvimentu nian, ne’ebé Governu trasa ona.

Alende ne’e, parseiru dezenvolvimentu sira lakohi hamrik iha ninin, maibé, hakarak atu involve direta husi mekanismu, komunikasaun no kordenasaun ida ne’ebé diak liu ho Governu TL.

“Parseiru sira prontu atu disponibiliza sira nia rekursu, tantu rekursu ema, tekniku no rekursu seluk, sira prontu atu apoiu Governu hodi mobiliza rekursu iha rai laran, no iha rai liur inklui rekursu ne’ebé disponivel husi nasaun seluk, atu bele ajuda Governu hodi la’o ba oin, no implementa prioridade dezenvolvimentu nian,”afirma, Ministru Fidelis Prezidensia Konsellu Ministru.

Alende ne’e, enkontru ne’ebé lidera husi PM ho prezensa, husi Ministru Prezidensia Konsellu Ministru, Ministru Finansas, hamutuk ho parseiru dezenvolvimentu, Nasoens Unidas reprezentante husi koordenador rezidenti, reprezentante husi banku mundial, no organizasaun nasoens unidas ba dezenvolvimentu UNDP/PNUD.Cin