JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Rogério Lobato: Operasaun skylight hanesan traisaun ba Nicolau Lobato no luta na’in sira

Rogério Lobato: Operasaun skylight hanesan traisaun ba Nicolau Lobato no luta na’in sira

Eis komandante FALINTIL, Rogério Lobato, deklara, operasaun skylight mosu tanba Alarico Fernandes hakarak hamutuk ho forsa invazór Indonézia sira hodi halakon tiha luta armada no tanba ne’e tenke oho saudozu Prezidente Nicolau Lobato.

“Hau foin hatene katak Mari Alkatiri halo “Certificado de Reconhecimento” hodi rekonhese Alarico Fernandes nia traisaun. Tanba ne hau deklara ba ema hotu katak hau la simu i hau kondena”.

“Xanana, hamutuk ho Ma’Huno, reorganiza FRETILIN no FALINTIL, hodi hatutan luta Prezidente Nicolau Lobato nian no mos kamarada sira nebe mate iha funu hamutuk ho nia no la to’o dalan rohan. Ne istoria luta ita nian. Hahalok nebe abut iha faktus susar atu kontra”, dehan Rogério Lobato ba Jornalista António Veladas iha rai liur foin lalais ne’ebé GMN hetan asesu.

ANTONIO VELADAS (AV): notisia nebe agora naklekar konaba Operasaun Skylight ne grave tebes. Ne’e liu tia ona tinan 42 mak povu Timor Leste foin hatene?

ROGERIO LOBATO (RL): hanesan ita hare, lia los no lia bosok lao hamutuk maibe lakahur malu. Neé hanesan bé no mina. Bele lori tempo naruk maibe lia los sei mosu nafatin.

Ita senti katak tempo naruk ida nune halo ema haluha tena Operasaun Skylight ka lae?

Uluk ema balun hatene maibe ladun koalia ba mai. Tamba ne’e komesa lakon iha ema nia ulun. Maibe teki tekir ema hotu komesa koalia fali tambá hau kondena no dehan ba ema hotu katak hau hakribi no lakohi simu desizaun ida ne’e.

 Oinsa mak nune fali ? Bele esplika diak liu ka?

Alarico Fernandes kole ona atu halo funu iha tempu neba. Nia halo krimi barak. Ida mak nia lori alu baku mate Senhor ida naran Alexander Lemos tanba senhor ne’e toman Alarico Fernandes halo kontaktu subar ho invazores Indonesio sira liu husi radio. Alarico hakfodak, tauk Senhor Alexander atu koalia sai, entaun nia foti alu ida lori baku mate senhor ne’e halo terus boót to’o mate.

Senhor Alexander Lemos asuwain Povo no rai Timor-Leste nian. Nai Maromak sei tau matan ba ita boot, Senhor Alexandre Lemos. Hau nia kolega CSM no luta ba ukun rasik an nian, rai ida ne’e be ita bot hadomi no simu ita boot nia ruin no ran sei kaman ba ita boot. Adeus to’o loron ne’e be eternidade mak sei halo ita hamutuk fali.

 Operasaun Skylight neé mosu tambá seda?

 Mosu tanba Alarico Fernandes hakarak hamutuk ho forsa invasor Indonesia sira hodi halakon tiha Luta Armada no tanba ne’e tenki oho Presidente Nicolau Lobato.

 Neé hahalok ida nebe, ita bele dehan katak “Traisaun Ida Bot Tebes” kontra  Nasaun Timor Leste?

 Ne’e los kedas no los duni. Ida ne’e ita lalika duvida, ne’e traisaun ida bo´ot liu mak ida ne’e. Alarico Fernandes halo traisaun bot tebes ba ita nia funu, tambá informa ba forsa invasores Indonesia nian fatin nebe Prezidente Nicolau Lobato hela ba, hamutuk ho forsa FALINTIL nebe fo protesaun ba nia. Ita labele haluha katak iha tempo neba  nudar Presidente FRETILIN nian, nia mos kaer knar boot nudar Presidente Republica RDTL no Comandante-em-Chefe  FALINTIL nian.

 Oinsa maka forsa invasores Indonesia sira nian hatene fatin lolos nebe Presidente Nicolau Lobato ho Falintil sira hela ba?

 Invasores Indonesia sira haruka subar ema ispiaun ba hafuhu no mos buka ho helicoptro  no ho aviaun. Bainhira sira hetan ona fatin los Prezidente Nicolau Lobato ho forsa FALINTIL sira nia akampament ntaun inimigu uza forsa indonesia rihun ba rihun hamutuk ho Timor Oan traidor sira hodi hale’u no halo serku.

 Oinsa maka inimigu sira halo asaltu?

 Inimigu invasores sira tuir Prezidente Nicolau Lobato, nebe simu protesaun husi FALINTIL, iha semana rua nia laran. Kombate ikus liu dura horas barak no hola fatin iha Tuto Luro, Manufahi. Inimigo invasor hakarak kaer moris deit hodi bele hamoe nia, no obriga nia atu fo ordem ba ita nia forsa sira atu rende an. Ne’e dalan ida nebe Prezidente Nicolau Lobato nunka bele simu no sei nunka tuir. Bainhira inimigo invasor tiru tohar ona nia ain, nia sai husi serku ladiak ona. Tanba ne nia tiru mate nia án hodi tau iha pratika liafuan nebe nia dehan bebeik bainhira nia sei moris ; “Kilat fuan ikus mak sei fo Vitoria ba Hau”.

Lee hotu :   Osan falsu viral iha TL hodi temi naran Xanana, CNRT husu Polísia investiga autór

Nia Mate iha funu laran hanesan aswain ida oin seluk, brani tebes, susar atu hetan ida hanesan.?

 Ne los duni. Tuir ain fatin Operasaun Skylight maka iha tempo badak inimigu invasor kaer no oho ulun bot barak FRETILIN nian nebe halo funu atu liberta ita nia rain.  Ulun bot sira nebe mate tuir Prezidente Nicolau Lobato maka hanesan tuir mai nee: Vise Presidente Anotinio Duarte Carvarino “Maulear” ho nia Bibere Maria do Ceu “Bilear”, Primeiro Ministro Vicente Reis “Sahe” ho nia Bibere Dulce da Cruz “WeWe”, Chefe Estado Maior FALINTIL nian Comandante Dominggos Ribeiro “Bere Manu Koko”, Primeiru no segundo Comandante Brigada Choque Sebastião Doutel Sarmento “Kakoak” no Guido Soares ho nia Bibere Elga Lobato, Comandante Setor Valente Soares “Maululi” no nune mos kuadros politiku no militar FRETILIN nian bot deit nudar Comandante Rosalino Gouveia Leite ho nia Buibere Lucia Cepeda, Komisariu Lere Vice Presidente FRETILIN nia alin, Hamis Bassarewan ho nia Bibere (senhor Agostinho Tinolina nia alin feto), Manuel Ramalinho da Cruz “Sekar” ho nia bibere “Soimali”, Jose Maria ( Maun husi ex-Mnec Zacarias da Costa), Artur Nascimento, Comandante Cirilo Nunes “Maubrani”, Comandante Gil Ribeiro ho nia Bibere Lili Lobato, Natalino Leitao “Somocho”, Eduardo dos Anjos “Kakuk”, Comandante Hermenigildo Alves , Oscar de Araujo “Manu Kei”, Joaquim Saldanha “Naha Berek”, Helio Pina ho ninia Bibere Norberta Lobato, Cesar Lebre “Maulaka”, Comandante Lino Olocasa ho seluk seluk tan.  Ema rihun barak, mane, katuas no joven, labarik no feto, mak mate tambá traisaun boot Alarico Fernandes halo kontra FRETILIN no FALINTIL liu husi Operasaun Skyligth.

Hau nia kaben rasik Maria Filomena Pinto Leite Lobato, hau nia banin mane ho feto Felisberto Gouveia Leite no Alexandrina Pires, hamutuk ho hau nian rian sira, ho mos Senhor Fernando Pedruco no tan parenti seluk, hamutuk ema 17, forsa Batalhaun Linud 100 maka Oho, rega deit ho Metralhadora, iha Fahi Nehan.

Ne rezultadu triste tebes husi Operasaun Skylight nebe dada lilu tinan 1979.

Iha liur, iha Frente Diplomatica, Operasaun Skyligth ne’e mos fo resultado at ruma ka lae?

 Iha liur, iha Mocambique, hau maka kaer kodiko militar nebe servisu Krypto FALINTIL nian entrega ba hau iha Quartel-General Taibessi, liu husi comandante Sebastiao Doutel Sarmento “Kakoak” nia liman rasik, molok hau atu sai husi Timor Leste ba Mocambique iha loron 4 Dezembro 1975.

Hau sei esplika iha loron seluk tambá seda maka kilat la toó iha Timor no razaun lolos tambá seda hau dadur iha Angola ho ema nebe denunsia hau ba polisia Angola nian.  “Ema nebe la deve buat ida, sei la tauk buat ida”. Hau sei koalia klaru iha tempo tuir mai. Hau la tauk atu koalia lia los tanba lia los mak lori liberdade no dignidade ba ita ema.

Mensajem Operasaun Skylight nian nebe Alarico Fernandes haruka ba rai liur, dirigi ba Mari Alkatiri nudar representante plenipontensiariu FRETILIN nian iha Mocanbique. Molok to’o iha hau nia liman, liu uluk husi ita nia radista iha Darwin, tuir mai liu ba Sidney, mak ita nia belun bot ema Australia naran Denis Frencey (Nia mate tena) mak haruka tutan ba hau. Bainhira too iha hau nia liman, hau hatoo kedas ba Servisu Siguransa Mocambique nian. Bainhira sira Leé, sira hakfodak ho situasaun nebe akontese iha ita nia rai laran. Liu tempo balun, Comité Central Partido FRELIMO nian, liu husi membro Buro Politico Emilio Aramando Guebuza fo hatene iha Katembe katak, hare ba mensagem nebe Alarico Fernandes haruka ne’e sai hánesan evidensia ida atu labele simu tan Mari Alkatiri nudar  Interlokutor  FRETILIN nian ba Partido FRELIMO no ba Governu Mocambique nian. Iha nia fatin Ramos Horta, Roque Rodrigues, Abilio Araujo ho hau rasik hili Jose Luis Guterres “Lugu” nudar representante foun hodi troka Mari Alkatiri. Sei iha tan “lia moe nebe subar” maibe loron ida hau sei dehan sai ba militante FRETILIN hotu no ba Povo Timor Leste tomak atu hatene.

Lee hotu :   Redus OJE privativu millaun US$17, Hodi tau prioridade ba deputadu foun

“Dura est veritas, sed veritas”. Lia los ne todan, tanba ne’e mak lia los”.

Operasaun Skylight tesi tomak lideransa Luta Armada Libertasaun Nasional nia ulun. Nee klaru kedas. Maibe kuadros balu nebe dok husi fatin nebe inimigo invasor sira ataka makas iha sorte boot tebes tanba la mate. Sira ne’e maka Xanana Gusmao, Juvenal Inacio, Falu Chai, Solan no Ma’Hunu. Maske numero kiik ona, maibe balu sei mate tan, na’in rua deit mak konsegue moris : Kay Rala Xanana Gusmao no Ma’Hunu Bulerek Karatayano.

 Xanana no Ma’Hunu, nudar sobreviventes, tenki halo fali buat ruma?

Sira na’in rua hari fali husi mate restu buat oituan nebe sei hamrik iha FALINTIL no Comite Central Fretilin nian. Xanana, ho apoio Ma’Hunu no ho kuadros medios balun, re-organiza fali FRETILIN no FALINTIL, hodi hatutan fali obra Presidente Nicolau Lobato nian no camarada sira nebe mate iha funu no la funu to’o rohan. Ne’e mak ita nia istoria los, baseia ba buat hotu nebe halo duni. Buat nebe halo no akontese duni susar atu prova oin seluk. Ne’e obra ida ke boot tebes. Ema nebe la hatene agradese ne ema beikten no matan delek.

Mari Alkatiri hanoin katak Comandante Rogerio Lobato apoia comandante Xanana Gusmao bainhira fo sai akuzasaun sira nune?

Mari Alkatiri buka ses an husi asuntu prinsipal, soe rai rahun ba militantes FRETILIN sira nia matan atu labele hare. Nia tenki dehan klrau, laos deit ba militantes FRETILIN sira, maibe ba povo Timor Leste tomak.  Nia halo duni traisaun ba memoria Presidente Nicolau Lobato nian ka lae, bianhira nia halo Certificado de Reconhecimento hodi rekonhese traidor Alarico Fernandes tambá husi traisaun nee mak halo lakon no halo mate lideransa tomak ita nia luta nian.

Alarico Fernandes halo duni traisaun ka lae?

Resposta neé simples tebes: Los ka Lae?

Secretario Geral buka ses an husi responsabilidade ka?

 Neé klaru. Iha rai selu iha mundo, karik mosu traisaun bot ida nune, ne’e Tribunal de Guerra hari kedas atu julga no kondena ema sira nebe implikadu. Kastigo ba krimi sira hanesan nee bot tebes. Maibe iha Timor Leste buat hotu oin seluk. Timor-Leste rai ida ke fo toleransi bot tebes no nunka lori ba tribunal ema sira nebe halo violasaun, oho no comete krimi oin-oin kontra ita nia povo. Tambá impunidade hodi la julga no kondena kriminosu bot sira mak agora, maski krimi hanesan traisaun bot mosu, ita nia sistema justisa la liga no diak hela.

Mari Alkatiri dehan katak Ita Bot suporta Comandante Xanana?

Mari Alkatiri senti la diak. Bainhira nia relasaun politika uluk diak ho Xanana, bolu tan “compadre” ba Xanana, laiha ema ida, no hau rasik, atu kontra buat ida neé. Hau hare hahalok ida hanesan neé normal iha politika. Maibe hau mos ladun fiar nia hahalok tamba hau hare katak nia “devosaun” ba nia “comapdre” bot demais. Hau hare nia hili duni dalan ida neé hodi bele hetan ukun iha Oecusse. Nufim nia hetan duni ukun ne’e iha Oecusse. Iha Oecusse nia halo konstrusaun obras mesak boot deit no uma luxu mesak karun deit. Maibe agora nia hirus Xanana. Tanba nee nia hakarak ema hotu tenki hirus mos Xanana. Nia mos kala hakarak hau atu hirus malu mos ho Xanana. Mas tambá seda mak hau tenki tuir nia hakarak? Nee hanoin ida ke hau hanaran “Logica de Batata”. Ema nebe ulun fehuk mak bele obriga ema hotu atu tuir arbiru nia hakarak. Uluk Xanana membro Comite Central FRETILIN nian, kontinuador nebe hatutan Presidente Nicolau Lobato nia obra bainhira nia reorganiza FRETILIN, FALINTIL no Resistencia kontra ocupasaun Indonesia nian no lori ita nian rain ba to’o ukun rasik aan. Xanana Presidente Partido CNRT, ne’e responsabilidade ninian tomak. Xanana deit mak hatene. Hau nudar militante FRETILIN sei luta atu hadia FRETILIN, sei hases FRETILIN husi ema at nebe halo foer FRETILIN nia naran no sei serbi FRETILIN to’o mate.

Lee hotu :   MUTL kontra desizaun PN sosa tan kareta foun ■PN sei larona ema nia protestu

 Mari Alkatiri dehan katak ita bot hakarak salva Xanana tanba Xanana desesperado?

Mari Alkatiri nunca hatene sukat nia liafuan, nanal ne’e ruin la iha tebes. Kuandu nia loke nia ibun, nia fakar sai deit lia kroat hanesan venenu. Hau Rogerio maka atu salva Xanana? Salva oinsa no tanba sa? Tuir hau nia fiar katoliku nian, Jesus maka mate iha curz hodi salva fiar nain hotu husi sala (pecado) tambá ne’e Jesus mak hau nia Salvador. Hau sala nain ida atu salva fali ema seluk oinsa? Mari Alkatiri halo konfuzaun tanba nia relijiaun ho hau nian la hanesan.

 Koalia Badak deit, ita bot nia preukupasaun maka seda?

Hau nia preokupasaun mak haka’as an atu re-organiza Fretilin, halo Fretilin ida nebe nakloke ba ema hotu, liu husi militânsia ida nebe halo militante sira hare malu hanesan maun alin, nebe tuir ho laran dalan kritika no auto kritika, tulun militante nebe susar no lideransa partidu nian haluha, abandona no la rekonhese, hakoak ema hotu, orgulho tanba aswain iha funu maibe hakraik an hodi rekonhese nia sala no nia fraqueza. FRETILIN ida nebe defende Konstituisaun RDTL nian, nebe buka ukun tuir dalan legal ho legitimu no bainhira manan sei nakloke atu ukun liu husi koperasaun ida nebe mai duni husi fuan ho forsa politika partidu sira seluk nian. Timor Leste rai ida nebe kiík, ho ema mos oituan tebes kompara ho rai seluk, maibe iha osan ho rekursus rai nian barak hodi bele halo politika desenvolvimento ekonomiku ho sosial ida nebe bele lori benefisiui hanesan ba ema hotu-hotu.

Ita hotu bele hamutuk mos ita la barak nafatin tambá rai nee kiik hela.

Mak ne deit?

Mari Alkatiri lalika hases militante sira nian atensaun ho kampanha bosok nian. Hau, hamutuk ho militante rihun barak nebe lakon ami nia familia tomak, ami hakarak FRETILIN ida nebe oin seluk, FRETILIN Povo nian nebe labele fila an fali hanesan propriedade privadu Mari Alkatiri nian, nia família ho nia grupo kiik oan sira balu nebe mak tuir nia tanba hakarak nafatin status quo.

Mari Alkatiri tenki dehan klaru ba ita hotu: Operasaun Skylight ne’e traisaun bot tebes. Los ka Lae?

Alarico Fernandes nebe loke Operasaun Skylight halo traisaun bot kontra ita nia luta. Los ka Lae?

Razaun seda mak lori Mari Alkatiri atu fo “Certificado Reconecimento” ba Alarico Fernandes?

Bainhira Mari Alkatiri assina “Certificado Reconhecimento”, nia halo traisaun kontra memoria Presidente Nicolau Lobato no kontra kuadros boot hotu  FRETILIN no FALINTIL nian nebe mate ho Presidente Nicolau Lobato. LOS ka LAE?

Militantes hotu FRETILIN nian no Povo Timor-Leste tomak iha direito atu ijiji resposta ida nebe Klrau no Los.

Kona-ba preokupasaun eis Komandante FALINTIL Rogério Lobato nian alin husi saudozu Nicolau Lobato ne’e bainhira GMN tenta konfirma ho Sekretáriu Jeral Partidu FRETILIN, Marí Bin Amude Alkatiri, maibe Alkatiri rasik lakohi fó komentáriu. GMN

Add to Comments Here!!!!

error: Content is protected.
Secured By miniOrange
You might also like:
Ran-turuk ida bele salva ema nia vida

Ran-turuk ida bele salva ema vida,...

UPF kaptura ema na’in 10 iha froteira terrestre

Unidade Patrullamentu Fronteira (UPF) kaptura ema...

PNTL laiha ekipamentu prevene COVID-19

Komandante Jerál Polísia Nasional Timor-Leste (PNTL)...

Close