Asosiasaun Antigu Deputadu hasoru PR, Meja PN rahun triste bo’ot ba povu tomak

Reprezentante Asosiasaun Antigu Deputadu, José Nominando Buras Martins, haktuir, aktu deputadu lejislatura dalima nian iha Parlamentu Nasional hodi harahun meja PN ne’e hatudu triste bo’ot ba povu Timor-Leste,  tanba ladun hatudu interese diskuti povu nia moris.

“Ami  husi membru asembleia  konstituente ne’ebé mak uluk hakerek konstituisaun  halibur-an iha Asosiasaun Antigu Deputadu,  mai koalia ho Prezidente Repúblika ho  pontu rua,  primeiru pontu  ami koalia kona-ba kestaun ne’ebé liga ho  asembelia konstituente,   ami membru 88 ne’ebé sanulu resin mate ona hela sira seluk,  alende ne’e Prezidente Repúblika iha tempu ne’eba hanesan mos Prezidente Asembeleia  Konstituente  depois asembleia konstituiente transforma-an ba Parlamentu Nasional  primeira lejislatura no atual Prezidente Repúblika altura ne’eba hanesan mos prezidente lejislatura  Paralamentu Nasional nian, ho  razaun ida ne’e mak ami mai koalia ho Prezidente Repúblika atu haree took membru sira ne’ebé balun sei moris no balun mate ona,  ami husu Prezidente Repúblika pelo menus tau matan ou konsiderasaun ruma ba membru sira ne’ebé mak sei iha”,dehan Buras ba Jornalista sira Segunda (27/7/2020), iha Palásiu Prezidensial Nicolau Lobato Bairo Píte, Díli.

Nia afirma, segundu pontu sira koalia kona-ba meza Paralamentu nian,  ne’ebé mak rahun iha meza ne’e nia leten maka  membru asembleia sira ida-idak ba asina konstituisaun iha nia leten,  maibe iha kinta lejislatura ne’e,  tanba diverjensia hanoin, meza ne’e rahun tiha.

“Ami la iha sentimentu pessoal ida,  pelo menus ami fo hanoin Prezidente Repúblika la bele haree meza ne’e hanesan  material ida, maibe haree meza ne’e ho nia valores istóriku ne’ebé mak iha, tanba situasaun iha Parlamentu lori triste oituan ba povu Timor-Leste tomak”,subliña Buras.

Nia akresenta, problema ne’ebé  iha Parlamentu Nasional,  problema husi partidu polítiku  ne’ebé nomeia nia membru ka eskolla nia membru sira ba tur iha Parlamentu mak ladun kualidade tanba ne’e hamosu situasaun ida ne’e, la’os tanba  deputadu sira, partidu ne’ebé haruka ema ba tur maka  la haree sasán ne’e ho didiak.

“Prezidente la hato’o mensajen ida propriu ba membru asembeleia konstituente sira, Prezidente rona deit ami nia pedidu ne’ebé husi proposta ne’ebé ami hato’o  ba Prezidente,  proposta ida mak sujestaun  ami-nia hanoin kona-ba meza ne’ebé rahun tiha, inklui kona-ba  konsiderasaun ba antigu deputadu sira, prezidente sei haree ho lei ho integra,  tanba sasán hirak ne’e tenke bazeia ba lei, labele naran deit,  ami so hato’o proposta deit maibe kompetensia tomak ne’e iha nai Prezidente Repúblika ninian”,tenik Buras.

Antes ne’e iha loron sanulu resin hitu, fulan ne’e, Vise Xefe Bankada CNRT no Vise Xefe Bankada PLP, Francisco de Vasconselhos deklara ona katak, dezentendimentu ne’ebé akontese entre partidu politiku  sira ne’e normal  tanba Timor-Leste iha hela faze konstrusaun Estadu. Oly