Hakarak defende povu nia moris mak mosu krítika malu iha PN

Vise bankada CNRT, Patrocinio Fernandes, informa, diferente ideia no krítika malu ne’ebé la’o iha Parlamentu Nasionál (PN) hodi hamosu dezintedimentu ne’e, tanba hakarak atu defende povu nia moris.

Áktu krítika malu no akuza malu ho linguajen oi-oin ne’ebé akontese kuaze semana-semana ikus mai hamosu dezintendimentu entre deputadu sira iha PN sai preokupasaun públiku, hodi hamosu interpretasaun oi-oin.

Maibé deputadu sira hateten, krítika no insulta malu iha PN ne’e nu’udár meius ida ne’ebé reprezentante povu uza atu defende povu nia moris.

“Ha’u hanoin iha plenária diskute malu no krítika malu hodi hamosu dezintendimentu ida ne’e normal, tanba iha plenária laran fatin polítiku bainhira hato’o povu nia preokupasaun ne’ebé laiha intendimentu, hodi hamosu dezintendimentu ne’e normal, tanba PN fatin atu diskute povu nia vida no moris”, informa Vise Xefe Bankada CNRT Patrocinio Fernandes ba jornalista iha  Parlamentu Nasionál semana ne’e.

Vise Xefe bankada CNRT ne’e subliña katak, natureza polítika ne’e atu enkoraja deputadu sira, hodi halo diskusaun ida ne’ebé produtivu liu.

Tuir Vise Xefe bankada PLP, Francisco de Vasconcelhos, hateten, mosu dezintendimentu entre deputadu sira iha PN ne’e normal, tanba Timor-Leste iha faze konstrusaun Estadu.

“Labele haree ba meza baku fila ho língua interese povu ni’an deputadu sira preokupa ne’e mak ita proekupa opiniaun públiku ni’an no dezenvolvimentu, tanba ne’e, PN prepara atu diskute lei Orsamentu Jerál Estadu (OJE). Ho dezintendimentu entre deputadu sira pro no kontra bainhira iha asuntu ne’ebé diskute iha plenária, bainhira deputadu sira hamri’ik hodi koalia ida ne’e, tanba demokrasia. Povu labele haree fali deputadu sira hakilar malu, tanba dezenvolvimentu, ita labele haree deputadu na’in 65 hanoin hanesan, maske hanoin la hanesan iha diverjensia ita hakarak Estadu no nasaun ne’e la’o ba oin, ita haree ba estabilidade dezenvolvimentu tenke la’o”, haktuir Vise Xefe bankada PLP ne’e.

Enkuantu opiniaun no interpretasaun ne’ebé ikus-ikus ne’e mosu iha públiku no sai virál hafoin mosu diskusaun polítika maka’as iha PN ne’ebé rezulta meza Prezidente PN baku fila foin la-lais ne’e, wainhira bankada maioria parlamentár halo destituisaun ba Prezidente PN sesante, Arão Noe no hili fali Prezidente PN foun, Aniceto Guterres. ety