OJE 2020 ba de’it Novembru-Dezembru

Primeiru Ministru (PM), Taur Matan Ruak, hateten, Orsamentu Jeral Estadu (OJE) tinan 2020 ho montante billaun ida resin, sei koresponde de’it ba fulan rua, liu-liu ba fulan Novembru no Dezembru.

“Orsamentu 2020 ni’an ne’ebé ke ami define tetu ba Billiaun 1.4 hanesan ne’e, ita boot sira haree pratikamente to’o OJE 2020 ne’e fulan rua de’it novembru no dezembru de’it, tanba ita serbisu hela ho duodesimal to’o setembru mak haruka ba parlamentu iha 15 ka 20 dias para serbisu depois ho Governu 10 dias hanesan ne’e, sua exelensia senhor prezidente iha tempu besik fulan ida ne’ebé ita haree hotu ne’e orsamentu lolos ne’e fulan rua de’it novembru ho dezembru de’it”, afirma, Xefe Governu, Taur Matan Ruak, iha Palásiu Presidente Nicolau Lobato, Bairo Pite, Kinta (09/07).

Governasaun daualu, durante ne’e funsiona de’it ho orsamentu duodésimu, relasiona ho Orsamentu Jeral Estadu tinan 2020, la pasa iha Parlamentu Nasionál iha fulan Janeiru liu ba.

Governu sei funsiona nafatin ho orsamentu duodesimu to’o fulan Outobru, tinan ne’e, hodi hein aprovasaun Orsamentu Jeral Estadu tinan 2020.

Antes ne’e, Primeiru Ministru Taur Matan Ruak, informa, Oitavu Governu sei aprezenta Orsamentu Jeral Estadu, tinan 2020 ba Parlamentu Nasionál, atu halo diskusaun.

Hafoin ne’e, tuir kedas ho aprezenta Orsamentu Jeral Estadu tinan 2021 iha loron 15, fulan Outobru ne’e. Ina