PM Taur orienta VMI-Komisáriu PNTL prepara programa prioridade OJE 2021

Primeiru Ministru  (PM) nu’udar mós Ministru Interiór (MI), Taur Matan Ruak, orienta Vise Ministru Interior (VMI), António Armindo, atu prepara programa prioridade ba Orsamentu Jeral Estadu (OJE), tinan 2021 atu tau prioridade ba área infraestrutura, no mos Komandante Jeral Polisia Nasionál Timor-Leste (PNTL), Komisáriu Faustino da Costa, atu tau prioridade ba servsiu tránzitu, inklui Fronteira Marítima.

“OJE 2021, Ministériu Interiór (MI), sei tau prioridade ba dezenvolvimentu PNTL, ho Bombeirus no protesaun sivíl, tanba ne’e Xefe Governu hanesan mós Ministru Interiór, fó orientasaun ba ha’u ho Sekretáriu Estadu Protesaun Sivíl (SEPS), Joaquim Gusmão, atu prepara programa ba iha OJE 2021 nian,” dehan, Vise Ministru Interior, António Armindo, iha Palásiu Governu, Sesta (24/07/2020).

Vise Ministru Interior ne’e relata, programa setór infraestrutura nian mak hanesan, hadi’a eskuádra polísia, postu Unidade Polísia Fronteira (UPF) no harii edifísiu ba servisu migrasaun.

“Kona-ba tetu OJE 2021 seidauk iha, ita-nia prioridade ba 2021 ne’e hala’i liu ba infraestrutura, ohin orienta ona, para ami bele haree infrastrutura ida ne’ebé mak importante, liu-liu iha protesaun sivíl, iha interiór PNTL, migrasaun, ami mós sei ba liu fronteira, hodi haree saida mak presiza bele tama iha kategoria infraestrutura para bele hadi’a di’ak liután,” tenik,VMI António.

Vise Ministru Interior ne’e subliña liu tan, iha infraestrutura prioridade ba tinan oin, atu haree ba eskuádra, postu ba Unidade Polisia Fronteira (UPF) sira, edifísiu ba migrasaun, Bombeirus, protesaun sivíl hotu-hotu envolve iha prioridade infraestrutura ba tinan oin.

Iha fatin hanesan, Komandante Jeral PNTL, Komisáriu Faustino da Costa, hateten, Xefe Governu orienta, atu OJE 2021, Komando PNTL tau prioridade ba area fronteira, inklui servisu tránzitu.

“Ha’u mai relata situasaun jeral ba Xefe Governu, no exelensia PM husu PNTL atu tau programa prioridade iha tinan 2021, hanesan area tránzitu, fronteira, polisiamentu komunitariu, ba iha suku sira,” afirma Komisáriu Faustino. Cin

Leave a Reply

Your email address will not be published. Required fields are marked *