JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

PM Taur rekoñese Padre sira nia luta ba ukun rasik-an

PM Taur rekoñese Padre sira nia luta ba ukun rasik-an

Primeiru Ministru (PM), Taur Matan Ruak, hateten, Timor-Leste nia independénsia ne’ebé ohin loron ema barak goza ne’e, konta ho igreja nia luta liu husi Padre sira nia, liu-liu Padre sira jerasaun iha tinan 40 ne’e hamriik iha oin.

Xefe Governu hato’o lia hirak nee ba JNDiário, Sábadu (18/07), hafoin partisipa iha misa agradesimentu padre Francisco Tavares dos Reis nia tinan moris, iha kapela Nossa Senhora de Fatima Balide.

“Jerasaun amu ni’an jerasaun tinan 40, jerasaun inspiradór ba libertasaun independénsia sira mak hamriik uluk mak jerasaun seluk, inspiradór ida mak padre Francisco Tavares dos Reis, to’o ohin loron amu nia kondisaun mak ladun di’ak, maibé ninia hanoin hanesan imi ho ha’u, imi aproveita maxímu sabedoria ho esperiénsia amu ni’an”, dehan, Taur Matan Ruak.

Governante ne’e apela ba jerasaun foun sira, atu aproveita oportunidade hodi estuda maka’as ba matenek ne’ebé Padre sira hanorin iha eskola, tanba futuru nasaun rai doben ida ne’e iha foinsa’e sira nia liman.

PM ne’e dehan, maske Padre Francisco Tavares dos Reis nia kondisaun ladun permite ona, atu hanorin ka fahe nia matenek ba jerasaun foun sira, maibé ho korazen forsa hodi fó hotu nia matenek ne’ebé nia iha ba foinsa’e sira, atu prepara ba futuru Timor nini’an.

“Hau lori ha’u nia família Governu no povu Timor-Leste tomak hodi fó ha’u nia parabens ba Padre Francisco Tavares dos Reis, ne’ebé ohin halo tinan ba dala-75, espera katak, sei aumenta tinan, saudavel nafatin hodi serve nafatin ita sarani sira no Maromak sei tulun ita hotu”, dehan Taur.

Misa agradesimentu ne’e partisia husi Xefe Governu, Taur Matan Ruak ho nia espoza Isabel Ferreira, Seminarista Semináriu Menor Nossa Senhora de Fatíma Balide no familía boot Padre Francisco Tavares dos Reis no misa diriji husi Padre Domingos Alves.

Lee hotu :   Alkatiri: Direitu autodeterminasaun tenki garante tratamentu hanesan

Iha omilia, Padre Domingos Alves husu tulun ba Na’i Maromak, hodi  hanaruk moris no haraik isin di’ak nafatin ba Padre Francisco Tavares dos Reis, nune’e bele kontinua serve sarani sira, liu-liu fahe nia espiritu matenek ba seminarista Timor-Oan sira iha semináriu Menor Balide no Semináriu Maior Fatumeta.

Padre Francisco Tavares dos Reis, mós kontribui maka’as ba luta libertasaun Timor-Leste, tanba iha tempu ne’eba, Padre Francisco Tavares ho padre sira seluk kontinua halo misa iha ai-laran, maske ho situasaun ida ne’ebé difisil.

Padre Francisco Tavares dos Reis, sente orgullu no agradese, tanba ho iis ne’ebé Na’i Maromak fó ba nia ne’e, to’o ohin loron sei iha nafatin.

Maske Padre Francisco Tavares dos Reis, nia kondisaun ladun premite ona, maibé nu’udar bibi-atan ne’ebé hili husi Na’i Maromak, Padre Francisco Tavares kontinua fahe ninia matenek ba foinsa’e sira ne’ebé estuda iha seminariu menor, tanba sira mak futuru nasaun ne’e ni’an.

Padre Francisco Tavares dos Reis, moris iha Balibo, iha loron 18, fulan Jullu, tinan 1945, husi aman Isaac dos Reis, husi munisipiu Ainaro no inan Agripina dos Reis husi Soibada, Munisipiu Manatuto.

Dau-daun ne’e Padre Francisco Tavares dos Reis, nu’udar Diretór Esperitual Semináriu Menor Nossa Senhora de Fatíma Balide. Padre ne’e mós sei hanorin seminarista sira iha seminariu menor kona-bá lian Latina, Portugues, inklui hanorin vida espiritual ba Frater sira iha Semináriu Maior  Fatumeta. Tos

Add to Comments Here!!!!

error: Content is protected.
Secured By miniOrange
You might also like:
RNDJK: PR Lú Olo viola konstituisaun tenke rezigna-an

Rezisténsia Nasional Defende Justisa no Konstituisaun...

Semana oin Governu lori fila traballadór 50, inklui mate-isin Timor-Oan husi Korea

Iha loron (30/07/2020) ne’e, Governu sei...

Governu loke fronteira terrestre, aéro no marítima, COVID-19 sai ameasa bo’ot ba povu TL

Ministra Negósiu Estranjeiru no Kooperasaun (MNEK),...

Close