Governu promete prepara OJE 2020-2021 ho kualidade

Ministru Prezidensia Konsellu Ministru (MPKM), Fidelis Leite Magalhães, afirma, Governu sei prepara Orsamentu Jeral Estadu (OJE), tinan 2020-2021 ho kualidade, Konsellu Ministru (KM) aprova projetu proposta lei OJE tinan 2020, ho montante billaun USD 1.4 no tuir kalendariu previstu, hato’o ba PN iha loron 15, fulan Setembru.

“Ita hotu akompaña katak dezde asume pose iha tinan 2018, Oitavu Goveru ne’e nia kada tinan prepara OJE dala rua, alende OJE kada tinan ida dala rua, iha mós Dotasaun Orsamentu Temporariu (DOT) kuaze kada tinan menus iha tinan 2009, ida ne’e dezafiu ida ne’ebé boot”, dehan, MPKM ne’e iha Palásiu Governu, Kuarta (26/08/2020).

Governante ne’e esplika, maibé sé Governu haree katak iha pasadu maske ho membru Governu la kompletu, maibé konsege kumpre iha submesaun orsamentu, maske iha dezafiu no difikuldade ne’ebé boot, buat ne’ebé mak Governu agora tenke halo eforsu ida, hodi kumpre tempu ne’ebé iha, maibé kumpre ho kualidade.

Fidelis subliña, Ministériu Finansas (MF) ho ekipa tekniku sira halo esforsu ho masimu, atu nune’e orsamentu rua ba tinan 2020 no 2021, la’o ho paralelu, atu halo tuir nafatin kalendariu ne’ebé aprova ona.

“Agora ita diskute hela OJE no Dotasaun Orsamentu Temporaria (DOT) kada fulan ita presiza halo rekonsiliasaun no relatóriu no Fundu COVID-19 ne’e sai hanesan naha todan ida, ne’ebé mak MF lori, maibé ita fiar katak dentru limitasaun ne’ebé mak iha, MF sei konsege hakat liu tan dezafiu ida ne’e ho di’ak”, relata MPKM ne’e. Cin