Governu sei ezonera Kalbuadi Lay husi kargu Prezidente Autoridade Expo Dubai

Ministru Turizmu Komersiu no Industria (MTCI-sigla Portugés), José Lucas do Carmo da Silva, hateten, iha tempu badak Governu sei halo ezonerasaun ba atual Prezidente Autoridade ba Expo Dubai, Francisco Kalbuadi Lay hodi nomeia fali ema seluk ba lidera fali autoridade refere.

José Lucas da Silva hateten, durante ne’e parte Governo husu ona atual Presidente Autoridade Expo Dubai, Franscisco Kalbuadi Lay, atu hato’o karta rezignasaun maibe to’o ohin loron presidente autoridade ne’e rasik seidauk submete karta resignasaun ruma. Ho nune’e, tuir ministro ne’e,  Governo sei hasai resolusaun ida hodi delega fali lideransa foun ida.

“Primeiro-Ministro convida hau mai atu koalia konaba assunto pendente ida ne’ebe maka durante iha hela Ministru Turizmu Komersiu Industria nia liman maka Expo Dubai ne’e katak uluk iha despaixu ida ho despaixu ne’e  iha ona nia ekipa iha nia orsamentu, maibe tamba razoes balun no assunto ida ne’e paradu la la’o tamba ne’e maka ohin Primeiro-Ministro bolu hau mai atu kolia para buka dalan hodi solusiona ida ne’e. Ho nune’e ohin iha ona orientasoens katak iha tempu badak  sei iha resolusaun ida atu delega ba Ministru Turismo Komersio no Industria(MTCI)”,  hateten Ministru Turizmu Komersiu no Industria, José Lucas do Carmo da Silva hafoin hasoru malu ho Primeiro-Ministro Taur Matan Ruak kuarta(08-05).

Entretantu atual Presidente Autoridade Expo Dubai Francisco Kalbuadi lay hetan nomesaun husi oitavu Governo iha loron 14 fulan juno tinan 2019 bazeia ba rezolusaun governu nian número 20 /2019.

Antes ne’e Koordenador  Programa Timor-Leste ba Expozisaun Dubai, Arif Abdullah Sagran hateten Expo Dubai ba tinan ne’e adia ona ba tinan 2021 tamba pandemia covid-19. Maske nune’e Arif Abdullah Sagran hateten, Timor-Leste kontinua halo preparasaun atu partisipa iha exposisaun refere.Oct