CNRT-PD: SEFOPE tenke muda sistema teste ba traballadór sira

Xefe Bankada CNRT, Duarte Nunes, husu ba Sekretaria Estadu Formasaun Profisionál no Empregu (SEFOPE) atu muda sistema teste fíziku ba traballadór hirak ne’ebé atu ba servisu iha Austrália, tanba konsidera hamosu sistema familiarizmu iha prosesu teste fíziku.

“Ha’u akompañia fó sai iha televizaun, ha’u imajina tinan kotuk traballadór barak mak hato’o ona keixa, tanba mosu diskriminasaun. Tuir regras ne’ebé prepara atu ba, hakfodak ema na’in rua ka tolu ba tiha ona, ha’u simu keixa barak. Iha tinan kotuk PN simu ona keixa barak husi traballadór sira, maibé lamentasaun kontinua mosu to’o rezulta ema baku malu. Teste ne’e ba sé mak iha kapasidade, ita halo kritériu ba ema hotu la’ós ema ida, ha’u nia família ita bele husik liu ida mak ema halo kontesta ne’e, ha’u akompañia iha televizaun menina ne’e la simu desizaun foin mak barani atu koalia sira barak mak la barani koalia“, Deputadu CNRT hato’o asuntu ne’e ba jornalista sira iha Parlamentu Nasionál (PN), Tersa (22-09-2020), relasiona iha loron 21, fulan ne’e, kandidatu traballadora Timor-Oan ida baku malu ho funsionáriu SEFOPE.

Tanba ne’e Duarte sujere, atu iha futuru labele funsionáriu SEFOPE mak halo teste fíziku, maibé buka ema seluk ne’ebé la’ós husi SEFOPE, nune’e  bele fó valór ho justu ba Timor-Oan hotu.

“Ha’u la investiga, sé keixa ne’e to’o iha inspetór ka to’o iha Governu bele halo inspesaun ou investiga di-di’ak, nune’e ba oin muda sistema, tanba haree ba teste fíziku maka’as liu, ita tenke haree kompañia presiza ema ho fíziku ka oinsa depende. Ha’u hanoin inspestór jerál buka to’ok investigasaun ba situasuan ne’e, hodi muda sistema”, tenik Xefe bankada CNRT ne’e. 

Husi sorin seluk, deputadu bankada PD, Mariano Assanami Sabino mós konsidera, teste fíziku ba traballadór sira ne’e hanesan teste atu sai militár ni’an, nune’e SEFOPE tenke muda sistema ho kritéria hirak ne’e, atu ema hotu bele hetan oportunidade.

“Nu’udár deputadu iha PN ami la aseita modelu hanesan ne’e, maibé SEFOPE mak tenke hadia estandarizaun teste saúde di’ak la’ós presiza dalan atu sai fali militár. Tanba traballadór servisu iha Austrália la’ós servisu atu ba militár servisu hanesan bai-bain, SEFOPE tenke halo estándar, nune’e labele mosu diskriminasaun no iha tendénsia halai ba militár ni’an. Ita tenke haree importante mak lian Ingles, mentalidade presiza muda, disiplina atu sukat oinsa, se la tama dormitóriu, tenke muda la’ós liu husi teste fíziku todan hanesan atu sai militár. Governu iha devér kria kampu servisu tenke halo tratamentu dignu”, tenik Assanami.

Molok ne’e, kandidatu traballadór Austrália, Abrão da Conceição mós lamenta ho kriteria ne’ebé SEFOPE implementa ba kandidatu sira, tanba Sistema teste ne’ebé SEFOPE uza hanesan teste atu sai membru F-FDTL ho PNTL. Ety