CNRT: Presiza halo auditoria ba dívida tokon USD 4 iha Timor GAP

Vise Xefe bankada CNRT, Patrocínio Fernandes, husu Prezidente Timor Gas And Petroleum (GAP), atu halo auditoria kona-bá dívida tokon USD 4 iha instituisaun refere, maibé kona-bá auditoria depende mós husi Prezidente Timor GAP.

“Ha’u haree iha relatóriu Timor GAP ni’an dokumentu formál Timor GAP hatama mai la mosu dívida ida ne’e, ida ne’e problema internu Prezidente Timor GAP foun ho Prezidente sesante sira na’in rua nia problema, sira na’in rua mak informa ba malu”, Vise Xefe bankada CNRT ne’e ba jornalista sira iha Parlamentu Nasionál (PN), Segunda (28-09-2020).

Patrocínio konsidera, kona-bá dívida iha Timor GAP hanesan Prezidente Timor GAP atuál ho Prezidente Timor GAP sesante mak deve malu, tanba ne’e sira na’in rua mak atu halo klarifikasaun ba malu.

“Kona-bá atu halo auditoria ida ne’e kompeténsia Prezidente ida agora, hanoin katak ne’e iha dívida fallansu ninia kompeténsia husu auditoria, ami husu Prezidente Timor Gap halo auditoria ida, hodi bele hatene dívida”, tenik deputadu CNRT ne’e.

Antes ne’e, António José Loiola de Sousa, ne’ebé hetan fiar sai nu’udár, Prezidente Timor GAP deklara katak, nia halo reestruturasaun iha instituisaun Timor GAP, tanba iha dívida ne’ebé boot, hodi selu konsultór sira duke despeza ba kompañia rasik.

Entretantu orsamentu iha tinan 2019 Timor GAP simu transferénsia públika hamutuk tokon USD 16 resin no ba tinan 2020 hamutuk tokon USD 16 resin. Ety