Governu seidauk deside fasilita billete ba Timor-Oan fila ho profesór Portugés

Governu liu hosi Ministra Negósiu Estranjeiru no Kooperasaun (MNEK), Adalgiza Albertina Magno, informa, Timor-Oan kuaze 100 resin ne’ebé sei fila hamutuk ho profesór Portugés na’in 5, sei sosa rasik billete, tanba Governu seidauk iha desizaun ruma atu fasilita, maibe estudante sei hetan apoia hosi sira-nia sponsor.

Maske nune’e, Adalgiza afirma tan, númeru ba Timor-Oan ne’ebé atu fila, seidauk fiksu, posibilidade sei aumenta, tanba Timor-Oan barak hein hela, maske aviaun atu mai ne’e inisiativa governu Portugál nian.

“Ne’e embaixada Portugál ho Ministeriu Edukasaun mak trata, tuir loloos mai iha dia 20 ne’e, maibe hosi CAFE balun la mai ona, maibe ami trata hela profesór prinsipál nain 5 ne’ebé mak atu mai iha dia 19 agora, profesór nain 5 mak sei mai uluk, tanba CAFE nia kuandu mai, sira tenke fila-fali ba, tanba tuir ita nia kontratu, ita tenke haruka sira fila-fali Dezembru, tanba ne’e mak balun hein to’o tinan oin mak mai dala ona.

Timor-Oan parese besik atus ida mak atu mai hosi Portugal, Cuba, Inglatera, maibe ne’e seidauk hatene loloos nia númeru total hira, ne’e sei númeru temporariu de’it, balun to’o dalan klaran lakohi mai ona, bele mós aumenta,” informa Ministra  Adalgiza hafoin remata partisipa forum ASEAN Rejional, iha MNEK, Sábadu (12/09/2020).

Aleinde ne’e, kona-bá formandu 70 iha Israel, governante ne’e simu ona informasaun, tanba ne’e, sei buka solusaun iha tempu badak.

“Sira hakerek ona karta mai, maibe ami koko para atu fasilita fila, tanba ami foin hetan sira nia pedidu ne’e loron rua ou tolu liu ba, ami mós koko trata hela sidadaun Timor-Oan hosi rai seluk, depois mak haree to’ok solusaun oinsa, depois karik iha ona solusaun ema hotu sei hatene,” tenik Adalgiza.

Entretantu, profesór Portugés ho Timor-Oan hirak ne’e, sei fila mai Timor-Leste iha fulan Setembru ne’e, ho aviaun WFP. Say