Mandati: Governu laiha planu instala bee iha jardin sira

Deputadu bankada FRETILIN, David Dias Ximenes “Mandati”, hateten, maske Governu halo konstrusuan ba jardin sira iha Díli laran, maibé Governu laiha planu atu halo  instalasaun bee, tanba ai-funan sira iha jardin sira kuaze mate hotu ona.

“Ita la’o iha Díli laran, ita-nia jardin sira ho estétika maka’as, maibé laiha planu atu hala’o kanalizasaun bee, tanba ne’e jardin sira ne’e relvas sira ne’e atu mate hotu de’it ona ita la tau torniquete para sustenta ita-nia relvado sira ne’e, ida ne’e situasaun, ita presiza fó konsiderasaun”, Deputadu bankada FRETILIN ne’e liu husi ninia intervensaun plenária, semana ne’e.

Mandati akresenta, jardin sira ne’e la’ós konstroe, maibé atu embeleza sidade Díli no atu atrai turista sira mai iha Timor-Leste.

Reprezentante Governu, Sekretáriu Estadu Komunikasaun Sosiál (SEKOMS), Mericio Akara, hateten, nia parte sei rejista preokupasaun husi deputadu sira ne’e no sei hato’o ba ministériu kompetente.

“Preoukpasaun sira mak ita boot sira hato’o balun tama ona planu, balun foun ne’ebé mak ha’u rejista, hau sei hato’o ba ministériu relevante atu tau iha planu, sé OJE 2021 la konsege, maibé OJE 2022 bele tau matan fali”,  dehan Governante ne’e.

Antes ne’e, iha tinan 2019, Governu liu husi Ministériu Turizmu aloka orsamentu USD 4000, atu halo manutensaun ba jardin públiku sira iha Díli laran, inklui mós fatin turizmu bee-manas Marobo no Ramelau. ety