MAP promete sei redúz importasaun foos

Ministru Agrikultura no Peskas (MAP), Pedro Reis, hato’o komprimisu sei servisu hamutuk ho parseiru dezenvolvimentu sira, hodi redúz ai-han importasaun ne’ebé mai husi nasaun estranjeiru durante ne’e.

“Atu redúz importasaun mak ne’e tenke kria took barajen halo nusa para hodi proteje udan-been, atu nune’e ita nia utilizasaun ka pemanfaatan kanál sira ne’e máximu, atu nune’e ita nia área produtivu sira ne’e ita bele kuda hotu, sé tinan ida ita kuda dala 2 ita garantia katak nasaun ki’ik oan komunidade uitoan ita la presiza importa, bele importa mais ho kuantidade tun, ho ami nia prezensa ami koko kolabora hotu-hotu, tantu tékniku sira no estrutura sira parseiru dezenvolvimentu sira hotu i husu atu hotu tau atensaun tau osan ba Ministériu Agrikultura no Peska (MAP)”, dehan, Ministru MAP ne’e ba GMN, hafoin partisipa iha serimónia entrega ekipamentu prevensaun COVID-19 ba MAP, iha Timor-Plaza, Kinta (24/09/2020).

Governante ne’e hatutan, iha Timor-Leste agrikultór sira, halo natar tinan ida dala ida deit, tanba ne’e atu garante seguransa alimentar iha rai laran, presiza ema hotu nia kontibuisaun.

MAP mós tau ona iha planu prioridade ba orsamentu tinan 2021 no sei tau atensaun ba kanál irigasaun hirak ne’ebé mak presiza hadia.

Alénde ne’e, MAP mós husu tan orsamentu adisionál ho montante USD tokon sanulu resin ualu. Ina