MAPKOMS lansa revista loron 100

Ministru Asuntu Parlamentár no Komunikasaun Sosiál (MAPKOMS) halo lansamentu ba revista loron 100 ministériu nia ezisténsia, hodi divulga informasaun kona-bá prioridade no progresu servisu ne’ebé durante ne’e implementa ona.

MAPKOMS hanesan ministériu foun iha VIII Governu ne’ebé foin eziste, hafoin Prezidente Repúblika (PR) fó pose ba Fransisco Martins da Costa Perreira Jerónimo hodi lidera ministériu refere, iha loron 29, fulan Maiu, tinan ne’e.

“Saída mak sai prioridade ba 100 dias ne’e ha’u hala’o hotu ona katak primeiru orgánika MAPKOMS ni’an tenke iha, tanba nia ministériu foun no aprova ona iha Konsellu Ministru (KM) no hein ba PR no programa vizita ba média hotu ona, iha buat balun mak bele halo ho sira no fasilita sira iha kbi’it hodi hala’o kna’ar ho di’ak, relasaun entre Parlamentu Nasionál (PN) ho Governu la’ós hanesan uluk, maibé loron ba loron di’ak, ba media oficcer sira agora hadia hotu ona la’ós 100%, maibé bele ona haree saída mak halo iha futuru”, MAPKOMS, Fransisco Martins da Costa Perreira Jerónimo iha salaun auditorium Ministériu Transporte no Komunikasaun, Sesta (25-09-2020).

MAPKOMS ne’e relata, iha Orsamentu Jerál Estadu (OJE) tinan 2021 ho montante USD6.616027 sei tau prioridade mós ba programa Naroman ba Suku, inklui fó formasaun ba media oficcer sira no dezenvolve média ki’ik sira ne’ebé laiha kapitál boot.

“Média balun la’ós empreza boot, maibé jornalista mak harii média ne’e la’ós mai husi ema ho kapitál, sira nia kapitál mak boa vontade, tanba hakarak partisipa iha dezenvolvimentu nasionál, presiza hakbi’it sira liu husi dalan loos no tuir lei”, tenik Francisco.

Governante ne’e mós lakohi fó komentáriu ruma relasiona ho asosiasaun na’in ba média Timor-Leste ne’ebé la partisipa iha konferénsia atu hili reprezentante ba Konsellu Imprensa (KI) períodu daruak.

“Ami la halo intervensaun barak, tanba lakohi interven servisu ne’ebé kompeténsia KI ni’an, MAPKOMS hanesan ministériu ne’ebé tau matan, maibé haree no aviza de’it”, hakotu Francisco. ida