MRNDJK: VIII Governu laiha dalan aprezenta OJE ba PN

Porta voz Movimentu Rezisténsia Nasional Defende Justisa no Konstituisaun (MRNDJK) RDTL, Ângela Freitas, hatete, tuir konstituisaun RDTL hatete laiha ona dalan ba VIII Governu atu aprezenta Orsamentu Jeral Estadu (OJE)  tinan 2020 no tinan 2021 ba PN, tanba ukun-nain sira agora ne’e ukun kontra kontituisaun hodi la obedese ba vontade popular ninian.

“Líder polítika ne’ebé  ukun dadaun ne’e atu kastigu povu, tanba realidade ne’ebé mak akontese dadaun ne’e VIII Governu ukun la tuir konstituisaun RDTL haruka, tanba konsidera problema sira ne’e hotu nia hun no abut mai husi  Prezidente Repúblika (PR) hodi prátika ho livre halo violasaun ba konstituisaun RDTL bazeia ba situasaun no kondisaun atual ikus kona-ba lalaok aprezentasaun OJE tinan 2020 laiha ona tempu atu jere no OJE 2021 iha tempu semana rua nia laran deit, tanba ne’e prátika aprezenta OJE ida ne’e hanesan prátika abuzu no halimar ho Estadu de direitu no povu besik millaun atus rua nia vida”, hateten Ângela Freitas ba GMN liu husi konferénsia imprensa iha Bairu Formosa, Díli, Sesta (24/09/2020).

Ângela husu mos ba Ministériu Públiku (MP) atu halo investigasaun ho independentemente ba eis Prezidente Autoridade Rejiaun Administrativa Espesial Oe-Cusse Ambeno (RAEOA), Marí Bin Amude Alkatiri kona-ba rezultadu inspesaun ne’ebé halo tiha ona husi Marí Alkatiri ba osan millaun atus 7 dolar amerikanu ne’ebé gasta iha RAEOA.

“Ami mos hakarak husu ba MP atu halo investigasaun ba Marí Alkatiri kona-ba rezultadu inspesaun ne’ebé halo tiha ona husi Marí Alkatiri kona-ba osan millaun atus 7 ne’ebé gasta iha RAEOA alende ne’e kontinua husu nafatin ba Marí Alkatiri atu hapara aktu ne’ebé planu atu halo estudu foun ba fronteira marítima no hakarak dada mina ba fali Austrália no mos husu orgaun kompetente hanesan PNTL, PSIK, no KAK atu halo investigasaun profunda hasoru Marí Alkatiri kona-ba sosa ró-ahi Haksolok ne’ebé selu tiha ona, maibe to’o ohin loron ró-ahi refere seidauk mai Timor-Leste”, dehan tan Porta voz MRNDJK ne’e.

MRNDJK RDTL  ne’e mós konsidera, líder polítiku ne’ebé  ukun daudaun ne’e atu kastigu povu, tanba realidade akontese ukun la tuir konstituisaun RDTL hodi povu mak sai sofrimentu nasionál no krize polítika ne’ebé agora dadauk nasaun enfrenta nia hun ho abut no planea mai duni husi Prezidente Repúblika (PR), Franscisco Guteres Lú Olo. aba