OJE 2021 PN propoin tokon USD 3 harii edifísiu foun

Sekretária Jerál Parlamentu Nasionál (PN), Cedelizia Faria dos Santos, informa, Orsamentu Jeral Estadu (OJE) ba tinan 2021 PN propoin tokon USD 3 atu harii edifísiu PN foun, tanba realidade hatudu kondisaun edifísiu PN, ladun seguru ba deputadu sira atu hala’o servisu.

Tanba ne’e, Sekretária Jerál PN ne’e hateten, totál orsamentu PN ba tinan 2021 hamutuk tokon USD 16.94, husi númeru ne’e tokon USD 3 mak utiliza atu harii edifísiu foun PN.

“Ami inklui orsamentu USD 3.000.000 atu harii edifísiu foun, tanba ne’e mak ita atinji milloens USD 16.89 tuir planu orsamentu milloens USD 3 ami sei halo transferénsia ba KAFI mega projetu. Orsamentu USD 16.98.066, orsamentu USD 3.000.000 harii edifísiu foun, PN sei transfere ba KAFI, tanba ne’e orsamentu PN 2021 atinji de’it milloens USD 13.89, diferénsia ho tetu ne’ebé Governu fó milloens USD 13 ultrapasa 7,4% kompara ho 2020 uza Dotasaun Orsamentu Temporariu (DOT) milloens USD 12 resin ba fali 2021 milloens USD 13 resin”, Cedelizia ba jornalista sira iha PN, Tersa (29-09-2020).

Entretantu OJE tinan 2021 hamutuk tokon 16 resin ne’ebé aloka ba saláriu vensimentu USD 5.581.03 bens servisu USD 6.250.029, kapitál menor USD 492.796 no kapitál dezenvolvimentu 3.000.000, inklui transferénsia públika 1.660.203. ety