Poupa osan iha PN, Luis: La presiza fotokopia dokumentu, manda elektróniku de’it

Deputadu bankada KHUNTO, Luis Roberto, husu ba Parlamentu Nasionál (PN) atu manda de’it dokumentu elektróniku ba kada deputadu ida-idak, ho nune’e la presiza fotokopia, atu nune’e bele poupa orsamentu iha PN.

“Tempu ona ita halo poupa orsamentu iha tinan kotuk, ha’u kestiona PN kada deputadu simu laptop ho flash ida, ita halo komparasaun ita nia PN ho Governu ne’e oinsa, ha’u sente ladún di’ak karik surat tahan kontinua bou iha meja leten. Ita iha planu dokumentu sira ne’e tenke liu husi eletróniku de’it labele gasta osan, surat tahan ne’e sai hanesan lixu”, deputadu bankada KHUNTO ne’e liu husi ninia intervensaun iha PN bainhira debate orsamentu privativu PN tinan 2021, Tersa (29-09-2020).

Ho nune’e, Luis sujere ba tékniku iha PN atu fó formasaun ba deputadu sira balun ne’ebé mak seidauk hatene uza laptop, tanba deputadu sira simu ona laptop ho flash ida, tanba ne’e tenke utiliza sasan hirak ne’e, hodi halo servisu.

“Koalia kona-bá poupa sei la halo 100%, maske Governu ida mai koalia kona-bá poupansa la halo ezekusaun mak nafatin hanesan ne’e laptop ne’ebé distribui ba deputadu sira nia funsaun mak save dokumentu legál husi Governu no PN. Ita simu tiha, rai tiha iha uma toba iha leten, husu mós funsionáriu ne’ebé iha ne’e liu ba tékniku sira ami deputadu sira balun la hatene uza laptop, ita koalia loos sé bele tékniku sira ne’e fó formasaun ba ita nia deputadu sira atu uza laptop ne’e, ita koalia onestu ita lalika foti ita nia-an aas liu presiza hadia mós buat kiik sira ne’e”, tenik deputadu bankada KHUNTO ne’e.

Prezidente PN, Aniceto Guterres, konsidera preokupasaun husi deputadu Luis Roberto ni’an kona-bá atu halo poupansa orsamentu iha PN.

“Ha’u sei lembra parese iha III lejislatura sosa laptop nia objetivu mak ida ne’e atu poupa iha meja deputadu surat tahan la presiza butuk hanesan ne’e surat tahan evakua ba bankada espasu iha bankada mós la to’o em causa surat tahan sira ne’e, hola laptop ho efisiénsia gastu iha Alat Tulis Kantor (ATK) sira ne’e se ita la uza teknolójia foun ne’e, tanba montante ba despeza ida ne’e mós boot“, klarifika Aniceto.

Ho nune’e, Prezidente PN ne’e aseita ho rekomendasaun deputadu refere no promete sei dezenvolve di-di’ak oinsa bele implementa ba oin, maibé presiza kolaborasaun husi deputadu sira.

Entretantu iha III lejislatura PN, deputadu sira simu ona laptop no flash ida atu halo poupansa osan, hodi labele gasta osan ba fotokopia, maibé to’o ohin loron deputadu sira kontinua gasta osan ba fotokopia. ety