PR sei reúne ho KE-KSDS kona-ba pedidu Governu ba renovasaun EE

Prezidente Repúblika (PR), Francisco Guterres Lú Olo, Kuarta (30/9), sei reúne ho Konsellu Estadu (KE) no Konsellu Superior Defeza no Seguransa (KSDS) hodi rona hanoin sira kona-bá pedidu husi Governu ba renovasaun Estadu Emerjénsia (EE) ba periódu loron tolu nulu ba oin.

Entretantu periódu EE ba dalimak hahú husi loron 5, fulan Setembru ne’e sei termina iha loron 4, fulan Outubru, tinan 2020.

Tuir komunikadu imprensa husi Palásiu Prezidensial, Tersa (29/9/2020) katak, haree ba pandemia COVID-19 ne’ebé seidauk hatene bainhira mak atu hotu.  Númeru kazu pozitivu iha país viziñu sira, Australia no Indonézia, liu-liu ho provinsia Nusa Tenggara Timur ne’ebé fahe nia fronteira terrestres hamutuk ho Timor-Leste, moras coronavirus aumenta. Atu evita  risku importasaun moras coronavirus hadaet mai territóriu nasionál no aplika medidas restritu ba prevensaun no kontrolu ninian, Konsellu Ministru aprova renovasaun EE no haruka pedidu mai Prezidente Repúblika (PR) atu deside.

Implementasaun EE nu’udar medidas prevensaun no kontrolu ba COVID-19 hodi hases sidadaun hotu-hotu iha Timor-Leste husi kalamidade públika.

PR uza nia poder konstitusionál tuir artigu 85, alínea g, konvoka membru sira seluk husi órgaun konsulta-Konsellu Superior Defeza no Seguransa no Konsellu Estadu atu rona ida-idak ninia hanoin kona-ba pedidu deklarasaun EE husi Governu.

Reuniaun Konsellu Superior Defeza no Seguransa sei hahú ohin (30/9), tuku 9 liu minutu 30, dadersan no Konsellu Estadu sei hahú tuku 11.

Hafoin tetu opiniaun husi  membru Konsellu Superior Defeza no Seguransa no Konsellu Estadu mak PR foin deside. Karik PR deside katak presiza duni Deklarasaun EE, sei husu autorizasaun husi PN, liu husi mensájen ida. Karik Parlamentu Nasional aprova pedidu ne’e, PR sei deklara EE liu husi Dekretu Prezidensiál.

Konvite husi PR hato’o ona ba membru hotu-hotu husi Konsellu rua ne’e.

Membru  sira ne’ebé halo parte Konsellu Superior Defeza no Seguransa mak: PR, Francisco Guterres Lú Olo, Primeiru-Ministru no Ministru Interiór, Taur Matan Ruak, Ministra Negósiu Estranjeiru no Kooperasaun, Maria Adalzija Magno, Ministru Defeza Filomeno Paixão, Ministru Justisa, Manuel Cárceres, Xefe Estadu Maior Jeneral F-FDTL, Lere Anan Timur, Komisáriu PNTL Faustino da Costa no Diretór Jerál Servisu Nasionál Intelijénsia, Manuel Serrano. Halo mós parte iha Konsellu ne’e, membru sira nomeadu husi Parlamentu Nasionál: Adérito Hugo da Costa, David Dias Ximenes, Abel Pires da Silva. Membru sira nomeadu husi Prezidente Repúblika mak: José Manuel Fernandes ‘Nakfilak’ no Cristina da Silva.

Membru sira ne’ebé halo parte Konsellu Estadu mak PR, Francisco Guterres Lú Olo, Eis Prezidente Repúblika, Xanana Gusmão, Eis-Prezidente José Ramos-Horta, Eis-Prezidente Repúblika no atuál Primeiru Ministru, Jeneral Taur Matan Ruak, Prezidente Parlamentu Nasionál, Aniceto Longuinhos Guterres Lopes.  Halo parte mós Konsellu ne’e membru sira nomeadu husi PR: Óscar Lima, Alcino de Araújo Barris, Maria Dadi Soares Magno, Laura Soares Abrantes no Faustino da Costa. Husi Parlamentu Nasionál: Eduardo de Deus ‘Dusae’, Aurora Ximenes, José Cornélio Guterres, Árcangelo de Jesus Gouveia Leite no  José dos Santos ‘Naimori Bucar’.*/MÍDIA PR