UDT/FM deside harii bankada ketak

Xefe bankada Frente Mudansa (FM), Isabél Ximenes, informa, UDT/FM, deside harii bankada keta-ketak, tanba espasu ba funsionamentu bankada rua ne’e la sufisiente atu hala’o servisu partidu ni’an, maibé antes ne’e forsa polítika rua ne’e, la’o hamutuk iha bankada ida de’it naran bankada UDT/FM.

“Haree ba mudansa polítika liu-liu ho destituisaun ba kargu Primeira Vise Sekretária meza Parlamentu Nasionál (PN) ne’ebé asume husi deputada Isabel Ximenes mak loke iha posibilidade deputada bele rekere fali nia direitu hodi harii bankada FM“, Xefe bankada FM, Isabél Ximenes  deklara ofisiálmente seperasaun bankada ne’e liu husi konferénsia imprensa iha PN, Tersa (15-09-2020).

Isabel akresenta, hafoin haree ba mudansa polítika, haree mós ba espasu ne’ebé agora eziste ba funsionamentu bankada UDT no FM limitadu tebes no la sufisiente, deputadu husi bankada rua ho ekipa apoiu bele movimenta hala’o kna’ar.

“Nu’udár partidu, ida-idak iha ideolójia, vizaun no misaun, valor ne’ebé mak la hanesan, ho nune’e sei sai konviniente liu ba kada bankada partidu polítiku, hodi bele funsiona iha bankada mesak, atu bele garante sensibilidade no kualidade atendimentu ba dirijente, militante no simpatizante kada partidu”, tenik Xefe bankada FM ne’e.

Xefe bankada UDT, Francisco Davíd Cárlos hateten, haree ba vizaun no misaun polítika partidu ni’an, maske fahe ba bankada ketak-ketak,  maibé kontinua armoniza situasaun polítika.

“Ita haree ba vizaun no misaun polítika ami bele fahe, ami armoniza nafatin situasaun polítika inísia ami la’o hamutuk tiha ona ho terseira sesaun lejislativa, ami hakarak fahe bankada”, tenik Francisco.

Entretantu bankada rua ne’e deside harii bankada ketak-ketak bazeia ba enkontru konjunta bankada rua ne’e, iha loron 6, fulan Juñu, tinan ne’e. ety