Arsenio konsidera Ângela Freitas halo akuzasaun falsa ba Marí Alkatiri

Prezidente Autoridade Rejiaun Administrativu Espesiál Oe-Cusse Ambeno (RAEOA), Arsenio Paixão Bano, konsidera, akuzasaun Ângela Freitas ba eis Prezidente Autoridade RAEOA-ZEESM, Marí Alkatiri katak depózita osan Estadu ba ninia konta bankária privada ne’e falsa, tanba osan Estadu ne’e iha hela konta bankária Zona Espesiál Ekonomia Sosiál Merkadu (ZEESM), la’ós iha bankária privada.

Antes ne’e iha konferénsia ne’ebé hala’o iha loron 24, fulan Setembru, tinan ne’e, Porta Voz Rezisténsia Nasionál Defende Justisa no Konstituisaun RDTL, Ângela Freitas akuza eis Prezidente Autoridade RAEOA-ZEESM (Marí Alkatiri-red) depozita osan Estadu ho montante USD 700.000.000 ba ninia konta bankária privada.

“Ami hakarak hatete katak, Orsamentu Jerál Estadu (OJE) tinan haat ne’ebé transfere ba RAEOA ne’ebé hatete husi señora Ângela dehan iha USD 700.000.000, akuzasaun ne’e falsu laloos. Nia mós dehan tinan haat nia laran husi 2015-2019 depózita iha BNU, funan tau fali ba konta bankária privadu no paradeiru husi funan sira ne’e ita la hatene iha ne’ebé, akuzasaun ne’e ha’u hanesan prezidente autoridade deklara ne’e laloos no akuzasaun ne’e falsu. Pior liu tan deklarasaun sira ne’e refere ba konta privadu Marí Alkatiri ni’an nu’udár primeiru prezidente autoridade, ne’ebé hatete katak funan sira ne’e transfere ba konta privada Marí Alkatiri ni’an, akuzasaun ne’e laloos, akuzasaun ne’e falsu”, deklara Prezidente Autoridade RAEOA ne’e liu husi konferénsia imprensa iha Gabinete Prezidente Autoridade RAEOA-ZEESM, Oe-Cusse, Sesta (09/10/2020).

Entretantu dau-daun ne’e OJE ne’ebé depózita iha konta bankária RAEOA-ZEESM hamutuk USD 182, 416, 559. 73.

Orsamentu restu ne’ebé iha, transferénsia husi OJE tinan 2015 to’o fulan Setembru, tinan 2020, ho aprovadu USD 647,728,885. Husi totál orsamentu ne’e ezekuta ona USD 465, 312 , 324. 27.

To’o notísia ne’e públika, jornalista GMN seidauk hetan konfirmasaun husi eis Prezidente Autoridade RAEOA-ZEESM, Marí Alkatiri. san