CNRT: Membru Governu laiha kapasidade hatán pergunta husi deputadu sira

Deputada bankada CNRT, Carmelita Caetano Moniz, konsidera membru Governu laiha kapasidade hatán pergunta husi deputadu sira, tanba pergunta no preokupasaun lubuk ida mak sira la responde.

“Orsamentu Jerál Estadu (OJE) presiza halo diskusaun ne’ebé kle’an, OJE ran Estadu nia, ami mos hakarak hatete buat ida pedidu esklaresimentu direitu deputadu ligadu ho OJE husu ba membru Governu sira laiha kapasidade atu resposta, ita husu pur husu, maibé pergunta barak mak Governu la hatán”, Deputada CNRT ne’e liu husi ninia intervensaun iha debate OJE faze espesialidade iha Parlamentu Nasionál (PN), Kuarta (07-10-2020).

Tuir Carmelita, iha debate OJE tinan 2020 ne’e membru Governu sira la preparadu no laiha kapasidade, tanba tuir esperénsia iha tinan kotuk membru Governu sira preparadu, hodi hatán kualker pergunta husi deputadu sira.

“Membru Governu la preparadu, la hatene ka kestaun kualidade, tanba halo proposta ita vota de’it, tanba laiha sentidu ka laiha nia importánsia, ita husu ba mós membru Governu la hatán, tanba la preparadu”, dehan deputada CNRT ne’e.

Iha fatin hanesan, deputadu PD, Mariano Assanami Sabino mós sujere ba meza atu jere di-di’ak prosesu debate, tanba debate OJE la’ós hanesan asuntu bai-bain ne’ebé hato’o iha plenária.

“Ha’u halo proposta, tanba ha’u iha hanoin mak halo proposta, ha’u a favor ba programa, ha’u presiza hatene, nune’e ha’u bele fó a favor, ha’u kontra, tanba ha’u hatene mak ha’u kontra. Ho nune’e, meza tenke haree asuntu, asuntu debate OJE la’ós asuntu bai-bain hanesan ita levanta iha Segunda, Tersa ka oinsa ka asuntu krusiál ruma, importante presiza iha resposta”, tenik Assanami.

Entretantu OJE tinan 2020 billiaun USD 1.4 ne’ebé PN aprova ona iha faze jeneralidade no dau-daun ne’e kontinua debate iha faze espesialidade. ety