Dada fibra ótika mai TL, José Reis aprezenta opsaun tolu ba PM

Vise Primeiru Ministru no Ministru Planu Ordenamentu Teritóriu, José Maria dos Reis no Ministru Transporte no Komunikasaun (MTK), José Agostinho da Silva, aprezenta opsaun tékniku, modalidade finansiamentu no opsaun polítika jurídika ba Primeiru Ministru (PM), Taur Matan Ruak, atu nune’e bele dada fibra ótika husi Austrália mai Timor-Leste (TL).

“Enkontru ida ne’e ho objetivu atu bele hato’o modalidade de finansiamentu no opsaun polítika jurídika ba PM kona-bá traballu tékniku ne’ebé durante ne’e husi ha’u nia ministériu hamutuk Ministériu Finansas (MF) no MTK ne’ebé haree kona-bá fibra ótika ne’ebé ita atu dada husi Austrália mai TL”, Vise Primeiru Ministru no Ministru Planu Ordenamentu Teritóriu ne’e iha Palásiu Governu, Tersa (20/10/2020).

Governante ne’e hatutan, opsaun tolu ne’e aprezenta ona ba PM atu bele lori ba Konsellu Ministru (KM).

“Ha’u hanoin semana oin sei aprova opsaun tolu ne’e iha KM ne’ebé ekipa tékniku prepara, ho nune’e para ita bele hatama fibra ótika mai TL”, subliña José Reis. Cin