FRETILIN konsidera Xanana foin hakfodak tanis hakuak povu

Deputada FRETILIN, Nélia Soares Menezes, hateten, líder karismátiku Kay Rala Xanana Gusmão foin hakfodak no tanis hakuak povu iha baze, hafoin haree kondisaun real povu nian.

“Ita tanis hakuak, rei tun, rei sa’e, ita hakfodak, ita hanoin buat bai-bain tanba sá tinan barak la halo eskola aat barak, ita nia oan sira tur iha rai, ohin ita hakfodak ida ne’e maka moras. Maske durante ne’e CNRT ukun tinan 10, ohin foin hakfodak tun ba vizita inan-aman no joven sira hodi haree kondisaun povu nian laiha bee-moos, eskola no estrada aat”, Deputada bankada FRETILIN ne’e liu husi ninia intervensaun hodi hatán deklarasaun bankada CNRT kona-bá Post Power Syndromes iha Parlamentu Nasionál (PN), Segunda (19-10-2020).

Hatán ba kestaun ne’e, deputada bankada CNRT, Virginia Ana Belo, hateten, labele kestiona movimentu asaun karidade husi Prezidente partidu CNRT, Kay Rala Xanana Gusmão, tanba movimentu ne’e la taka dalan ba ema selu atu halo asun karitativa.

“Ha’u nia hanoin sé ita boot sira kestiona ba movimentu maun boot Xanana ninian, ha’u konsidera ita boot sira tauk, kuandu haree maun Xanana ba baze, tanba ne’e mak ita boot sira kestiona.  Timor ne’e ita hotu nian livre sé-sé de’it mak atu ba bele ba, laiha ema ida mak bandu, autoridade lokál mós hein hela sé-sé mak hakarak ba, ne’ebé lalika kestiona fali movimentu maun boot Kay Rala Xanana   nian atividade nia la’o lori ba ajuda ninia povu sira”, tenik Virginia.

Antes ne’e, líder nasionál, Kay Rala Xanana Gusmão, hala’o ona asaun karitativa iha munisípiu 12, inklui Reziaun Administrativa Espesiál Oe-Cusse Ambeno (RAEOA). ety